सोयगाव (सीएससीएन वृत्तसेवा) : सोयगाव तालुक्यातील जरंडी ग्रामपंचायतीने घेतलेल्या निर्णयांची सध्या जिल्हाभर चर्चा होत आहे. उघड्यावर शौचास जाणाऱ्या ग्रामस्थांना १ हजार रुपये दंडासोबतच घराचा पाणीपुरवठा बंद करण्याची आणि रेशनचे धान्यही बंद करण्याची व इतर योजनांचा लाभही न देण्याची शिफारस ग्रामपंचायतीने तहसीलदारांकडे केली आहे. ग्रामपंचायतीच्या बुधवारी (२५ डिसेंबर) झालेल्या ग्रामसभेत हा निर्णय घेण्यात आला. आई-वडिलांना सांभाळ न करणाऱ्या मुलाचा मालमत्तेतून वारसा हक्क काढून मालमत्तेत फेर घेण्यात येणार नसल्याचा ठरावही ग्रामस्थांनी घेतला आहे.
सरपंच स्वाती पाटील यांच्या अध्यक्षतेखाली विशेष ग्रामसभा झाली. ग्रामविकास अधिकारी सुनील मंगरुळे यांनी गावालगत उघड्यावर शौचास जाणाऱ्यांवर कारवाईचा ठराव मांडला. त्याला सर्वांनी मंजुरी दिली. यापुढे गाव परिसरात उघड्यावर शौचास जाणाऱ्या व्यक्तीला १ हजार रुपये दंड आकारण्याचा ठराव घेण्यात आला. गावाच्या वेशीवर चारही बाजूंनी व मुख्य रस्त्यावर सीसीटीव्ही कॅमेरे बसविले आहेत. हातात डब्बे घेऊन शौचास जाणारा व्यक्ती कॅमेऱ्यात कैद झाल्यावर त्याची चौकशी करून दंड आकारण्यात येईल. याशिवाय संबंधिताच्या घरचे रेशनचे धान्य बंद करण्याबाबतचा व त्यांना कोणत्याही शासकीय योजनांचा लाभ देऊ नये, अशी शिफारसही तहसीलदारांकडे करण्याचा ठराव या वेळी मंजूर करण्यात आला. ग्रामसभेला उपसरपंच संजय पाटील, ग्रामपंचायत सदस्य वंदना पाटील, मधुकर सोनवणे, संजीवन सोनवणे, दिलीप पाटील, अमृत राठोड, प्रकाश पवार, विष्णू वाघ, उत्तम गवळे, शिवा चौधरी आदींची उपस्थिती होती.
.jpg)
