छत्रपती संभाजीनगर (सीएससीएन वृत्तसेवा) : छत्रपती संभाजीनगर शहर आणि जिल्ह्यात पावसाने सोमवारी (२ सप्टेंबर) हाहाकार उडवला. रविवारी रात्री आणि सोमवारी दिवसभर झालेल्या पावसामुळे नद्या-नाल्यांना पूर आला. नदीकाठची जमीन वाहून गेली. मुसळधार पावसामुळे शेतात पाणी साचून खरीप हंगामातील हाती आलेली पिके वाया गेली असून, रब्बीच्या पिकांची झालेली पेरणीही कामातून गेली आहे. नुकसानीचे पंचनामे करण्याचे आदेश पालकमंत्री अब्दुल सत्तार यांनी दिले आहेत. दरम्यान, आज, ३ सप्टेंबर रोजी सकाळी ६ ला जायकवाडी धरणाची पाणीपातळी ८९.३३ टक्के झाल्याची माहिती पाटबंधारे विभागाने दिली आहे.
-छत्रपती संभाजीनगर शहर व परिसरात ८६ मि. मी. पाऊस कोसळला. दिवसभर सूर्यदर्शन झाले नाही. सखल भागातील घरात पाणी शिरून नागरिकांना त्रास जागून काढावी लागली. सोमवारी रात्री साडेआठला चिकलठाणा औद्योगिक वसाहतीतील कोहलर पाॅवर कंपनीजवळ सुरक्षारक्षकाचे घर कोसळून वृद्धेसह नातू गंभीर जखमी झाला. सात ते आठ फुटांची भिंत त्यांच्या अंगावर कोसळली. सिंधू शेषराव बनसोडे (वय ६२), प्रशांत किरण दुसिंगे (वय १२) अशी जखमींची नावे आहेत. हर्सूल तलावाची पाणीपातळी २० फुटांवर गेली आहे. तलाव भरण्यासाठी आणखी ८ फूट पाणी हवे आहे. रेल्वे सेवेवरही परिणाम होऊन अनेक रेल्वेगाड्या रद्द झाल्या. त्यामुळे प्रवाशांचे हाल झाले. नरसापूर-नगरसोल एक्स्प्रेस ३, ४ सप्टेंबरला रद्द करण्यात आली आहे. मुंबई-सिकंदराबाद देवगिरी, काकीनाडा- साईनगर शिर्डी एक्स्प्रेस रद्द करण्यात आली. साईनगर शिर्डी-काकीनाडा एक्स्प्रेस आज ३ सप्टेंबरलाही रद्द आहे.
-कन्नड तालुक्यातील घाटशेंद्रा येथे दीड वर्षीय साई कडूबा बोरसे हा चिमुकला सोमवारी दुपारी नाल्याच्या पाण्यात वाहू गेला. त्याचे आई-वडील शेतात पत्नीसह काम करत असताना नाल्याजवळ असलेल्या साईला पाण्याने वेढले. काही वेळाने त्याचा मृतदेह लिंबाच्या झाडाच्या मुळ्यांमध्ये अडकलेला मिळाला.
-फुलंब्री तालुक्यातील शेवता येथील ४५ वर्षीय रावसाहेब नाना बेडके यांनी शेतात जाताना गिरजा नदीच्या पुरातून दुचाकी नेण्याचा प्रयत्न केला. पाण्याचा प्रवाह जास्त असल्याने पुलावरून ते वाहून गेले.
-सोयगाव शहरातील जुना बाजार चौक भागात सोना नदीच्या पुराचे पाणी १५ घरांत शिरून कौशल्याबाई मधुकर गव्हांडे व रवींद्र परेराव यांची घरे कोसळली. घरातील लोक वेळीच बाहेर पडल्याने वाचले. एका घराची भिंत कोसळून कोकिळाबाई संजय बागूल (वय ४०) व मोहित गणेश सपकाळे (वय ४) हे आजी-नातू गंभीर जखमी झाले. नांदा तांडा (ता. सोयगाव) शिवारात तुकाराम मोहन चव्हाण (वय ४०, रा. नांदा तांडा) पोळा सण साजरा करून शेतात गेले असता रात्री आठला पावसामुळे झाडाखाली थांबले अन् झाडावर वीज कोसळून त्यांचा जागीच मृत्यू झाला. त्यांच्या पश्चात पत्नी, दोन मुले, दोन मुली असा परिवार आहे.
-सिल्लोड शहरात अनेक नद्यांना पूर आला. नदीकाठच्या शेतातील पिके वाहून गेली. सिल्लोड शहरासह खुल्लोड, चिंचवन, आमसरी, देऊळगाव बाजार येथील २० घरांची पडझड झाली आहे. बहुली गावाला गावाला पुराच्या पाण्याने वेढा दिला. घाटनांद्रा-पाचोरा रस्त्यावरील घाटात दरड कोसळली. काही काळ वाहतूक ठप्प झाली होती. अजिंठा, वेरूळ येथील धबधबे जोरदारपणे प्रवाहित झाले आहेत.
-कन्नड तालुक्यातील वाकोदला पुराच्या पाण्याने वेढा दिल्याने सोमवारी सकाळी ९ पासून दुपारी ४ पर्यंत या गावाचा तालुक्याशी संपर्क तुटला होता.
-छत्रपती संभाजीनगर तालुक्यातील लाडसावंगी शिवारातील दुधना नदीला मोठा पूर येऊन आला. नायगव्हाण, अंजनडोह, आडगाव सरक, लिंगदरी या गावांत मुसळधार पाऊस झाला.
.jpg)
.jpg)
