छत्रपती संभाजीनगरात कुपोषणाने आदिवासी महिलेच्या मृत्‍यूमुळे खळबळ!; भारंभार योजना अन्‌ कूचकामी योजनांची लक्‍तरे वेशीवर टांगली गेली!!

छत्रपती संभाजीनगर/वैजापूर (सीएससीएन वृत्तसेवा) : आदिवासी महिलेचा कुपोषणाने मृत्‍यू झाल्याच्या घटनेने जिल्हा प्रशासनात खळबळ उडाली आहे. शनिवारी (१३ जुलै) मध्यरात्रीनंतर पहाटे एकला छत्रपती संभाजीनगर येथील घाटी रुग्णालयात या महिलेने शेवटचा श्वास घेतला. ललिता सोमनाथ मोरे (वय ४०, रा. पारळा, ता. वैजापूर) असे या महिलेचे नाव असून, या घटनेमुळे शासकीय योजनांची लक्‍तरे वेशीवर टांगली आहेत. भारंभार योजना आणि यंत्रणेकडून होणाऱ्या उपाययोजना किती कूचकामी आहेत, हेच यातून दिसून आले असून, प्रशासनाची लक्‍तरे वेशीवर टांगली गेली आहेत.

ललिता मोरे काही दिवसांपासून कुपोषणामुळे आजारी होत्या. त्यांची तब्येत जास्तच खालावल्याने शुक्रवारी (१२ जुलै) छत्रपती संभाजीनगर येथील घाटी रुग्णालयात आणले होते. उपचारादरम्यान त्‍यांचा शनिवारी मध्यरात्रीनंतर एकच्या सुमारास मृत्यू झाला. या घटनेनंतर छत्रपती संभाजीनगर सिटी न्‍यूजने अधिक माहिती घेतली असता वैजापूर तालुक्‍यातील पारळासह वडजी, भादली, तलवाडा या गावांत मोठ्या प्रमाणावर आदिवासी वस्ती असून, या गावांतील अनेक बालके व महिला कुपोषित असल्याचे समोर येत आहे. शासनाचा आरोग्य विभाग कागदोपत्री भुते नाचविण्यात किती मश्गूल आहे, हेच या प्रकारामुळे समाेर आले.

कुपोषणमुक्‍तीसाठी सरकारकडून लाखो रुपयांचा निधी खर्च करण्यात येतो. हा निधी नक्की कुठे जातो, असा प्रश्न निर्माण झाला आहे. दुसरीकडे आदिवासी महिलेचा कुपोषणाने झालेल्या मृत्‍यूचे प्रकरण दाबले जात असल्याने या प्रकरणाची वरिष्ठ स्तरावरून चौकशी होण्याची मागणी पारळा येथील माजी उपसरपंच विशाल शेळके यांनी केली आहे.

या घटनेसंदर्भात वैजापूरचे तालुका वैद्यकीय अधिकारी डॉ. राजनाथ इंदुलीकर यांनी पत्रकारांना सांगितले, की ही महिला थायरॉईडने ग्रस्त होती. त्यामुळे तिचा मृत्यू झाला. कुपोषणाबाबत माहिती नाही. तर एकात्मिक बालविकास प्रकल्प अधिकारी विद्या देशमुख म्हणाल्या, की एकात्मिक बालविकास प्रकल्प अधिकारी कार्यालयांतर्गत ० ते ६ वर्षे वयोगटातील बालके आणि गरोदर व स्तनदा मातांना पोषण आहार देण्यात येतो. ही महिला यात येत नाही. त्यामुळे या महिलेच्या मृत्यूचा आमच्या कार्यालयाशी काहीही संबंध नाही.