सिल्लोड (सीएससीएन वृत्तसेवा) : ३५ वर्षीय चुलत साडूचे अपहरण करून आधी पैसे मागितले, त्याने नकार दिल्याने त्याचा खून करून मृतदेह शेतात पुरला. नंतर मृतकाच्या भाचाला मेसेज करून खंडणी मागितली. हा खळबळजनक प्रकार घाटनांद्रा (ता. सिल्लोड) येथे बुधवारी (२५ सप्टेंबर) समोर आला.
कैलास नामदेव मोरे (वय ३५, रा. घाटनांद्रा) असे खून झालेल्याचे नाव असून, पोलिसांनी क्रूरकर्मा संजय राजेंद्र मोरे (रा. घाटनांद्रा) याला सिल्लोड ग्रामीण पोलिसांनी अटक केली आहे. कैलास शनिवारच्या (२१ सप्टेंबर) सकाळी १० पासून बेपत्ता झाला होता. सगळीकडे शोधूनही न मिळाल्याने अखेर सिल्लोड ग्रामीण पोलीस ठाण्यात तो हरवल्याची तक्रार कुटुंबीयांकडून करण्यात आली होती.
कैलासचा भाचा जीवन ज्ञानेश्वर निकम (रा. सावरगाव) याच्या मोबाइलवर कैलासच्या मोबाइलवरून व्हॉट्स ॲप मेसेज आला. त्यावर कैलास हमारे कब्जे में है, ३० लाख रुपये दो, वरना उसकी लाश भी नही मिलेगी…असे लिहिले होते. त्यामुळे पोलिसांनी हे प्रकरण गांभीर्याने घेत सखोल तपास सुरू केला. कैलासच्या मोबाइलवर शेवटचा कॉल कैलासचा चुलत साडू संजय मोरे याचा होता.
स्थानिक गुन्हे शाखेने त्याला बुधवारी रात्री अटक केली. पोलीस खाक्या दाखवताच तो पोपटासारखा बोलू लागला. त्याने कैलासच्या खुनाची कबुली दिली. गुरुवारी दुपारी पोलिसांनी त्याला सोबत नेत घटनास्थळाची पाहणी केली. मृतदेह बाहेर काढण्यात आला. कुजलेला असल्यामुळे घटनास्थळीच उत्तरीय तपासणी करण्यात आली. त्यानंतर त्याच्यावर अंत्यसंस्कार करण्यात आले. कैलासच्या पश्चात आई, वडील, पत्नी, दोन मुले, एक मुलगी असा परिवार आहे.
खून का केला?
खुनाचे कारण समोर आले असून, संजयने पैशासाठी कैलासचा घात केला. त्याला कॉल करून बोलावून घेत गोड बोलून शेतात नेले. तिथे पैशाची मागणी केली. त्याने नकार देताच संजयने त्याचा ताराने गळा आवळून खून केला. मृतदेह मकामध्ये लपवून ठेवला. त्यानंतर तो घरी गेला. कैलासच्या कुटुंबीयांना त्याला शोधण्यासाठी मदत करण्याचे नाटक केले. रात्री पुन्हा शेतात जाऊन कैलासचा मृतदेह बांधावर खड्डा करून पुरला. काही झालेच नाही या अविर्भावात घरी येऊन झोपी गेला. दुसऱ्या दिवशी कुटुंबीयांनी सिल्लोड पोलिसांत कैलास हरवल्याची तक्रार दिली. शेअर मार्केटमध्ये ४० लाख रुपयांचे नुकसान झाल्याने त्याने पैशांसाठी नात्याचीही पर्वा केली नाही.
.jpg)
