कन्नड (सीएससीएन वृत्तसेवा) : शहरातील चाळीसगाव रस्त्यावर अनेक महिन्यांपासून नगर परिषद आणि पोलिसांच्या दुर्लक्षामुळे मोठ्या प्रमाणावर अतिक्रमणे थाटली गेली आहेत. सोमवारी आठवडे बाजाराच्या दिवशी तर वाहतूक खोळंबून जाते. त्यातच एका अतिक्रमणधारक व्यापाऱ्याने हद्दच केली. गॅस सिलिंडर घेऊन जाणाऱ्या ट्रकला ताडपत्रीने उभारलेल्या एका दुकानाचा बांबू अडकला. यामुळे दुकानाचे नुकसान झाले. त्यानंतर व्यापाऱ्याने ट्रक अडवून तासभर ट्रकचालकासोबत भांडण केले व नुकसान भरपाई करून घेतली. या काळात शहरातील या मुख्य रस्त्यावर वाहतूक तासभर खोळंबली होती. त्यामुळे वाहनधारकांना त्रास सहन करावा लागला. त्यांनी व्यापाऱ्याविरुद्ध संताप व्यक्त केला.
सोमवारी (९ डिसेंबर) सकाळी अकराच्या सुमारास मनमाडहून गॅस सिलिंडर घेऊन ट्रक शहरात आला. याचवेळी साहित्यरत्न अण्णा भाऊ साठे चौकात ताडपत्रीने उभारलेल्या एका दुकानाचा बांबू ट्रकमध्ये अडकला. त्यामुळे दुकानाचे नुकसान झाले. संतप्त झालेल्या व्यापाऱ्याने ट्रक रोखून धरला. झालेल्या नुकसानीची भरपाई मागितली. ट्रकचालक त्याला समजावून सांगत होता. मात्र व्यापारी काही ऐकण्याच्या मनःस्थितीत नव्हता.
सकाळी ११.३० पासून दुपारी १२.३० वाजेपर्यंत वाद सुरू होता. त्यामुळे वाहतूक ठप्प झाली. ट्रक चालकाकडून नुकसानभरपाई देखील वसूल केल्यानंतर व्यापाऱ्याने ट्रक पुढे जाऊ दिला. रस्त्यावरील वाहतुकीला अडथळा होईल अशा पद्धतीने अतिक्रमण करूनही वरून दादागिरी करून वाहनधारकांना वेठीस धरणाऱ्या व्यापाऱ्यामुळे आता अतिक्रमणांचा विषय ऐरणीवर आला असून, नगर परिषदेने याकडे गांभीर्याने पाहण्याची गरज निर्माण झाली आहे.
.jpg)
