मोठी बातमी : छत्रपती संभाजीनगरात ११ ते २३ ऑगस्टदरम्यान सैन्यभरती

छत्रपती संभाजीनगर (सीएससीएन वृत्तसेवा) : अग्निपथ योजनेअंतर्गत छावणीतील सैन्य भरती कार्यालयात ११ ते २३ ऑगस्ट दरम्यान सैन्यभरती मेळाव्याचे आयोजन करण्यात आले आहे, असे भरती संचालक कर्नल अनूज सिंघल यांनी कळविले आहे.

छत्रपती संभाजीनगर, बुलडाणा, हिंगोली, जळगाव, जालना, नांदेड आणि परभणी या जिल्ह्यातील उमेदवारांसाठी ही भरती प्रक्रिया राबविण्यात येणार आहे. ९ जुलै २०२४ रोजी झालेल्या ऑनलाईन सीईई पात्रता चाचणी परीक्षेत पात्र ठरलेल्या उमेदवारांसाठी ही भरती प्रक्रिया राबविली जाणार आहे. पात्र उमेदवारांचे भरती प्रक्रियेचे प्रवेशपत्र त्यांच्या वैयक्तिक ई-मेल वर www.joinindianarmy.nic.in या वेबसाईटवरून पाठविण्यात आले आहे. प्राप्त झालेले प्रवेशपत्र व आवश्यक कागदपत्र यांच्यासह उमेदवारांनी भरती मेळावा स्थळी उपस्थित रहावे, असे कळविण्यात आले आहे.

सर्व उमेदवारांना प्रवेशपत्र व बोटांचे ठसे तपासून मगच भरतीच्या ठिकाणी प्रवेश दिला जाईल. तसेच वैद्यकीय व शारीरिक चाचणी उत्तीर्ण उमेदवारांची अंतिम निवड यादी सप्टेंबर २०२४ मध्ये प्रसिद्ध होईल. या यादीतील उमेदवारांना अग्निपथ योजनेअंतर्गत भारतीय सैन्य दलात सेवेसाठी पाचारण केले जाईल. उमेदवारांनी आपली सर्व आवश्यक कागदपत्रे, प्रतिज्ञापत्रे, छायाचित्रे सोबत आणावी. ही भरती प्रक्रिया अत्यंत पारदर्शक प्रक्रियेने होणार असून भरती करून देतो असे सांगणाऱ्या बनावट, तोतया व्यक्‍तींपासून सावध रहावे व त्याबाबत भारतीय सैन्य दलातील अधिकाऱ्यांना तात्काळ कळवावे, असे आवाहनही करण्यात आले आहे.

जिल्हा- तालुकानिहाय भरती प्रक्रियेचे वेळापत्रक असे…
११ ऑगस्ट : सर्व जिल्ह्यांतील उमेदवार- अग्निवीर ऑफिस असिस्टन्स , स्टोअर किपर टेक्निकल पदांसाठी. परभणी जिल्ह्यातील उमेदवार- अग्निवीर जनरल ड्युटी.
१२ ऑगस्ट : नांदेड-अग्निवीर जनरल ड्युटी.
१३ ऑगस्ट : छत्रपती संभाजीनगर(छत्रपती संभाजीनगर, गंगापूर, कन्नड, खुलताबाद तालुका)-अग्निवीर जनरल ड्युटी.
१४ ऑगस्ट : छत्रपती संभाजीनगर( पैठण, फुलंब्री, सिल्लोड, सोयगाव,वैजापूर तालुका) -अग्निवीर जनरल ड्युटी.
१५ ऑगस्ट : जळगाव(अमळनेर, भडगाव, भुसावळ, चाळीसगाव, मुक्ताईनगर तालुका) – अग्निवीर जनरल ड्युटी.
१६ ऑगस्ट : जळगाव(बोदवड, चोपडा, धरणगाव, एरंडोल, जळगाव, जामनेर आणि पाचोरा तालुका)-अग्निवीर जनरल ड्युटी.
१७ ऑगस्ट : जळगाव(पारोळा,रावेर,यावल तालुका), जालना(बदनापूर, भोकरधन,धनसावंगी आणि जालना)- अग्निवीर जनरल ड्युटी.
१८ ऑगस्ट : जालना(अंबड, जाफराबाद,मंठा,परतूर), हिंगोली(सर्व तालुके) -अग्निवीर जनरल ड्युटी.
१९ ऑगस्ट : बुलडाणा(बुलडाणा,चिखली,देऊळगाव राजा,जळगाव जामोद, खामगाव, लोणार,मलकापूर) )-अग्निवीर जनरल ड्युटी.
२० ऑगस्ट : बुलडाणा (मेहकर, मोताळा, नांदुरा, संग्रामपूर, शेगाव आणि सिंदखेडराजा) -अग्निवीर जनरल ड्युटी.
सर्व जिल्हे अग्निवीर टेकनिकल (ऑलआर्म्स), अग्निवीर ट्रेड्समन ८ वी पास (ऑलआर्म्स)
२१ऑगस्ट : सर्व जिल्हे अग्निवीर ट्रेड्समन १० वी पास (ऑलआर्म्स)