छत्रपती संभाजीनगर (सीएससीएन वृत्तसेवा) : ओबीसीतून आरक्षणासाठी मनोज जरांगे यांचे सहा दिवसांपासून अंतरवाली सराटीत उपोषण सुरू असून, त्यांच्या समर्थनासाठी आज, २२ सप्टेंबरला सकाळी साडेदहाच्या सुमारास मराठा बांधवांनी केंब्रिज चौक रोखून धरला. अर्धा तास रास्ता रोकोमुळे मोठी वाहतूक कोंडी होऊन वाहनांच्या रांगा लागल्या. पोलिसांनी आंदोलकांना ताब्यात घेतले. त्यानंतर वाहतूक सुरळीत करण्यात आली.
सकल मराठा समाजाचे सुरेश वाकडे, सतीश वेताळ, सुनील कोटकर, नितीन देशमुख, दिनेश शिंदे, अशोक वाघ, निवृत्ती डक, दीपाली मिसाळ यांच्या नेतृत्त्वात शेकडो मराठा बांधव केंब्रिज चौकात एकत्र आले. त्यांनी रास्ता रोको सुरू केला. अवघ्या काही मिनिटांतच वाहनांच्या रांगा लांबपर्यंत लागल्या.
आंदोलकांनी रस्त्याची डावी बाजू अडवली होती. काही वाहने रस्त्याच्या दुसऱ्या बाजूने जालन्याकडे जात असताना आंदोलकांनी त्यांनाही अडवण्यासाठी त्याही बाजूला वाहने आडवी लावली. पोलिसांनी त्यांना रोखल्याने त्यांचा पोलिसांसोबत वाद झाला. घोषणाबाजी करून आंदोलकांनी चौक दणाणून सोडला.
मुस्लिम बांधवांची पदयात्रा मोंढा नाका उड्डाणपुलाजवळच अडवली…मनोज जरांगे यांच्या आंदोलनाला पाठिंबा देण्यासाठी क्रांती चौकातून मुस्लिम बांधवांनी आज, २२ सप्टेंबरला सकाळी पदयात्रा काढली. त्यांच्या रॅलीमुळे कायदा-सुव्यवस्थेचा प्रश्न निर्माण होणार असल्याने मोंढा नाका उड्डाणपुलाजवळच ही रॅली अडविण्यात आली. सरकारी कामात अडथळा आणल्याप्रकरणी रॅलीच्या आयोजकांविरुद्ध गुन्हा दाखल करण्यात आल्याची माहिती पोलीस सूत्रांनी दिली. क्रांती चौक ते अंतरवाली सराटी अशी ही पदयात्रा सकाळी ११ वाजता क्रांती चौक येथील छत्रपती शिवाजी महाराज यांच्या पुतळ्याला पुष्पहार अर्पण करून रवाना झाली होती. आम्हाला दुपारी १२ ते सायंकाळी ६ पर्यंत पोलिस ठाण्यात डांबून ठेवल्याचे आयोजक कलीम सलीम पटेल म्हणाले.
.jpg)
.jpg)
.jpg)
.jpg)
.jpg)
