टू व्हीलर मेकॅनिक संघटनेचा वर्धापन दिन थाटात, राज्‍य अध्यक्ष घुले म्‍हणाले, नवतंत्रज्ञान आत्‍मसात करा, व्यसनांपासून दूर राहा!

छत्रपती संभाजीनगर (गणेश निंबाळकर : सीएससीएन वृत्तसेवा) : सध्या युग तंत्रज्ञानाचे आहे. अधिक प्रगती करायची असेल, यश मिळवायचे असेल तर नवीन तंत्रज्ञान आत्‍मसात केल्याशिवाय पर्याय नाही. मेकॅनिक बांधवांनी अत्‍याधुनिक टूल्सचा वापरावा, नवतंत्रज्ञानाची कास धरावी. व्यसनांपासून दूर राहावे, असे आवाहन टू व्हीलर मेकॅनिक संघटनेचे राज्य अध्यक्ष राजेंद्र घुले यांनी छत्रपती संभाजीनगरात केले.

छत्रपती संभाजीनगर टू व्हीलर मेकॅनिक संघटनेच्या वर्धापन दिनानिमित्त तापडिया नाट्यमंदिरात कार्यक्रम झाला. त्‍याला छत्रपती संभाजीनगर जिल्ह्यासह नांदेड, जालना, गेवराई, माजलगाव, बुलडाणा, जालना, जळगाव, धुळे यासह अन्य जिल्ह्यांतून दोन हजारांहून अधिक मेकॅनिक उपस्थित होते. संघटनेचे संस्थापक अध्यक्ष सय्यद चांद यांनी प्रास्ताविक केले. प्रमुख पाहुणे म्हणून फेडरेशन उपाध्यक्ष संतोष पवार, ऑटोमोबाइल्स व टायर डीलर असोसिएशनचे अध्यक्ष प्रवीण आँचलिया, उपाध्यक्ष रवींद्र लोंढे, राजेंद्र शिंदे, नितीन किरवे, सुनील इंगळे, शेख बादशाह, शेख सिराज, दिलीप गोरडे, किशोर पाटील, सतीश पांचाळ, यशवंत चव्हाण, शेख अमीन, प्रकाश चौधरी आदी उपस्थित होते. दादासाहेब तांबे, राम पारखे, सदाशिव कुमावत, शेख गफ्फार, शेख जाफर, शेख नूर, शेख इस्माईल, बाळासाहेब पवार, शेख इरशाद, सरवरखान, शेख जमीर आदींनी कार्यक्रमासाठी पुढाकार घेतला. यावेळी विविध ४० स्पेअर पार्ट व ऑईल बनवणाऱ्या कंपन्यांचे प्रदर्शन भरविण्यात आले होते. मेकॅनिकला बदलत्या तंत्रज्ञानाची माहिती व्हावी म्हणून बीएस ६ गाड्यांच्या प्रशिक्षणाचे आयोजन विनामूल्य करण्यात आले होते. यात गाडीमधील वायरिंग, इंजेक्टर, सेंसर, फ्युएल पंप, इसीयूयाबद्दल सखोल प्रशिक्षण देण्यात आले.