छत्रपती संभाजीनगरातील मुख्यमंत्र्यांच्या सव्वा पाच लाख लाडक्‍या बहिणी खुश!; खात्‍यावर ३ हजार रुपये झाले जमा…

छत्रपती संभाजीनगर (सीएससीएन वृत्तसेवा) : मुख्यमंत्री एकनाथ शिंदे यांनी शब्द दिल्याप्रमाणे माझ्या खात्यात तीन हजार रुपये जमा झाले. रक्षाबंधनाआधीच आमच्या या लाडक्या भावाकडून ओवाळणी मिळाली, खूप आनंद झाला!, हे उद्‌गार आहेत जिल्ह्यातील बहिणींचे.

जिल्ह्यात मुख्यमंत्री : माझी लाडकी बहीण योजनेसाठी एकूण ५ लाख ४१ हजार ७१६ अर्ज आले होते. त्यापैकी ५ लाख ३३ हजार ७८३ लाभार्थी पात्र ठरल्या आहेत. या पात्र लाभार्थी महिलांच्या बँक खात्यात दोन महिन्यांचे तीन हजार रुपये काल पासूनच जमा होत होते. पैसे जमा झाल्याचे संदेश मोबाईलवर पाहून महिलांच्या आनंदाला पारावार राहत नव्हता. यानिमित्ताने बिडकीन (ता. पैठण) या गावातील महिलांशी संपर्क साधला असता त्यांनी दिलेल्या प्रतिक्रिया फार बोलक्या होत्या. छाया नरवडे, सुशिला पगारे, सुशिला टाकेकर, शोभा वाघ, शाहीन शेख, शकिला सैय्यद, वंदना भालेराव, मुमताज शेख, मीरा मुरजारे, प्रियांका जोशी, ज्योती रोठे या काही बहिणींचे मनोगत जाणून घेतले असता त्यांनी आपल्या भावना व्यक्त केल्या.

आपल्या हक्काचे पैसे मिळाल्याचा आनंद या महिलांच्या चेहऱ्यावर स्पष्ट दिसत होता. आपल्या भावाने पाठवलेली ही रक्षाबंधनाची ओवाळणी म्हणून हा पैसा निव्वळ योजनेचा लाभ न राहता त्याला एक वेगळे भावनिक परिमाण लाभले आहे, असे या बहिणींच्या मनोगतातून स्पष्ट होते. कुणाला आपल्या संसाराला हातभार लाभल्याचे अप्रुप होते तर कुणाला आपल्या हक्काचे पैसे मिळाल्याचा आनंद होता. भावाने दिलेला शब्द पाळला, अशीही भावना व्यक्त केली. एकंदर महिलांच्या जीवनात या योजनेमुळे बदल होऊन त्यांच्यात आत्मविश्वास बळावलेला दिसला.