चिकलठाणा विमानतळ विस्तारीकरणाच्या हालचाली गतिमान!; जिल्हाधिकाऱ्यांनी बैठक घेऊन दिले ‘हे’ आदेश…

छत्रपती संभाजीनगर (सीएससीएन वृत्तसेवा) : चिकलठाणा येथील छत्रपती संभाजीनगर विमानतळ विस्तारीकरणाचे काम वेळेत मार्गी लावण्यासाठी भूसंपादनाचा कालबद्ध कार्यक्रम राबवावा, असे निर्देश जिल्हाधिकारी दिलीप स्वामी यांनी दिले.

विमानतळाच्या विस्तारीकरणासाठी मंगळवारी (१६ जुलै) जिल्हाधिकारी कार्यालयात आढावा बैठक झाली. खासदार डॉ. भागवत कराड, अप्पर जिल्हाधिकारी तेजुसिंग पवार, उपजिल्हाधिकारी प्रभोदय मुळे, विशेष भूसंपादन अधिकारी विश्वनाथ दहे, उपविभागीय अधिकारी व्यंकट राठोड, विमानतळ प्राधिकरण व्यवस्थापक शरद येवले, सिडको प्रशासक जी. आर. साटोटे, विधी अधिकारी ॲड. उषा वायाळ, प्रादेशिक अधिकारी (एमआयडीसी) चेतन गिरासे, जिल्हा अधीक्षक भूमि अभिलेख डॉ. विजय वीर, कार्यकारी अभियंता अशोक येरेकर, रेल्वेचे जनार्दन बालमूच, महावितरणचे अधीक्षक अभियंता शांतीलाल चौधरी, अधीक्षक अभियंता एस. एस. भगत, जिल्हा अधीक्षक कृषी अधिकारी प्रकाश देशमुख आणि स्थानिक शेतकरी उपस्थित होते.

बैठकीत काय चर्चा झाली…
विमानतळ विस्तारीकरणाच्या अनुषंगाने रेल्वे अंडरपासची आवश्यकता नाही, असे रेल्वेच्या अधिकाऱ्यांनी सांगितले. विस्तारीकरणाच्या अनुषंगाने महानगरपालिकेमार्फत १५ मीटर रस्त्याच्या भूसंपादनाची कार्यवाही करण्यात यावी. भूसंपादनाची कार्यवाही महाराष्ट्र शासनाने करावी व भूसंपादन अधिकारी विशेष घटक यांनी निधी मागणीचा प्रस्ताव द्यावा. प्रस्तावित भूसंपादन क्षेत्रात येणाऱ्या सिडकोची घरे व अन्य मालमत्तांसंदर्भात शासकीय नियमानुसार कार्यवाही व्हावी. संपादन संस्थेने भूसंपादनासाठी शासन निर्णयानुसार आवश्यक निधी उपलब्ध करून द्यावा, 0असेही बैठकीत ठरविण्यात आले.