छत्रपती संभाजीनगर (सीएससीएन वृत्तसेवा) : डॉक्टर या शब्दाचा अर्थ बदलून टाकण्याचा प्रयत्न सध्या घाटी रुग्णालयातील निवासी डॉक्टरांनी चालवला आहे. मागण्या मान्य करून घेण्याच्या हट्टासाठी पेटून उठत निवासी डॉक्टरांनी दुसऱ्या दिवशीही संप चालूच ठेवल्याने रुग्णांचे हाल होत असून, एकप्रकारे रुग्णांच्या जिवाशीच खेळले जात असल्याचे चित्र दिसून येत आहे. यात सरकारने हस्तक्षेप करून निवासी डॉक्टरांवर आता कारवाई करण्याची गरज निर्माण झाली आहे. निवासी डॉक्टरांनी क्रूरतेचा कळस गाठला असून, ते कर्तव्य विसरल्याचा संताप रुग्ण आणि त्यांचे नातेवाइक व्यक्त करत आहेत.
बुधवारीही (१४ ऑगस्ट) तब्बल ४३२ निवासी डॉक्टर संपावर होते. वरिष्ठ डॉक्टरांनी परिस्थिती बऱ्यापैकी नियंत्रणात ठेवली असली तरी हेल्पिंग हॅन्ड असलेले निवासी डॉक्टर नसल्याने रुग्णांचे हाल होत आहेत. दिवसभरात इमर्जन्सी आणि रुटीन अशा ४५ शस्त्रक्रिया पार पडल्या, मात्र ९ शस्त्रक्रिया रद्द करण्याची वेळ आल्याचे घाटीच्या सूत्रांनी सांगितले.
वॉर्डांत रुग्णांना पाहण्यासाठी डॉक्टरच नव्हते. मेडिसीन विभागात खाटा कमी अन् रुग्ण जास्त असे चित्र दिसत असून, अनेकांना जमिनीवर गादी टाकून, दोरीने सलाईन लावून उपचार घेण्याची वेळ आली आहे. ओपीडीत बुधवारी २२८८ रुग्णांवर उपचार करण्यात आले. ८२ रुग्णांना घाटीत भरती करून घेण्यात आल्याचे वैद्यकीय अधीक्षक डॉ. सुरेश हरबडे यांनी सांगितले.
संप का?
कोलकाता येथील मेडिकल कॉलेजमध्ये एका महिला डॉक्टरवर अत्याचार करून तिची निर्घृण हत्या केल्याचा निषेध आणि सुरक्षेच्या दृष्टीने मागण्यांकडे लक्ष वेधण्यासाठी निवासी डॉक्टरांनी मंगळवारपासून संप पुकारला आहे. मेडिकल प्रोटेक्शन ॲक्टला लवकरात लवकर मंजुरी मिळावी. घाटीतील सुरक्षारक्षकांत वाढ करावी, अशी मागणी मार्डचे अध्यक्ष डॉ. रोहन गायकवाड यांनी केली आहे.
.jpg)
.jpg)
.jpg)
