छत्रपती संभाजीनगर (सीएससीएन वृत्तसेवा) : छत्रपती संभाजीनगर शहरात डेंग्यूच्या रुग्णांची संख्या झपाट्याने वाढत आहे. महापालिकेच्या उपमुख्य आरोग्य वैद्यकीय अधिकारी डॉ. अर्चना राणे यांनी सांगितले की, सध्या चार रुग्ण आढळून आले आहेत. हे रुग्ण बेगमपुरा, पदमपुरा, रोशनगेट या परिसरातील आहेत. २४ संशयित रुग्णदेखील आहेत. सर्व रुग्णांवर खासगी रुग्णालयांत उपचार सुरू आहे. खासगी रुग्णालयांना रुग्णांची माहिती रोज महापालिकेला कळविणे बंधनकारक करण्यात आले.
रुग्ण आढळलेल्या पदमपुरा, बेगमपुरा, रोशनगेट भागात महापालिकेने सर्वेक्षणही सुरू केले आहे. शहरात सध्या सर्दी, खोकला, ताप असलेल्या रुग्णांच्या संख्येत वाढ होत आहे. महापालिकेच्या आरोग्य केंद्रासह खासगी रुग्णालयांत सकाळी, संध्याकाळी रुग्णांची गर्दी वाढली आहे. गेल्या आठवड्यात रोशनगेट येथील १३ वर्षीय मुलीचा, आरेफ कॉलनी येथील १० वर्षीय मुलाचा मृत्यू झाल्यानंतर महापालिका अलर्ट मोडवर आली आहे.
दाट लोकसंख्या असलेल्या वसाहतींमध्ये सर्वेक्षण करून उपाययोजना केल्या जात आहेत. काही रुग्णांच्या रक्ताचे नमुने पुणे येथील एनआयव्ही लॅबकडे तपासणीसाठी पाठवले आहेत. त्याचा अहवाल येणे बाकी असल्याचे सांगण्यात आले. डेंग्यू होऊ नये म्हणून नागरिकांनी आपले घर आणि परिसर स्वच्छ ठेवावा. कुठेही पाणी साचू देऊ नये. ताप आल्यास त्वरित डॉक्टरांकडे जावे. विशेषतः लहान मुलांची अधिक काळजी घ्यावी, असे आवाहन डॉ. अर्चना राणे यांनी केले आहे.
.jpg)
.jpg)
.jpg)
.jpg)
.jpg)
