छत्रपती संभाजीनगर (सीएससीएन वृत्तसेवा) : उल्कानगरीत खिवंसरा पार्कमधील गणपती मंदिराजवळ रविवारी (१४ जुलै) मध्यरात्रीनंतर दोनच्या सुमारास बिबट्या दिसला. वीजपुरवठा कशामुळे खंडित झाला हे शोधत असताना लाईनमनला दुचाकीच्या हेडलॅम्पच्या उजेडात बिबट्याचे दर्शन झाले अन् त्याची भीतीने गाळण उडाली. त्याने अख्खी उल्कानगरी जागी केली. वन विभागाच्या पथकाने दिवसभर नाला, पडके घर, झाडेझुडूपे धुंडाळली, फटाके उडवले, जाळ्याही आणल्या, रात्री पिंजरा ठेवला… पण बिबट्या काही हाती लागला नाही.
बिबट्या सोमवारी पहाटे ३:४७ वाजता गल्लीत फिरताना सीसीटीव्हीत कैद झाल्याचे स्पष्ट झाले आहे. उल्कानगरीतून नाला वाहत असून, बहुतांश ठिकाणी तो भूमिगत आहे. त्या ठिकाणी झाडेझुडूपे खूप वाढली आहेत. गणपती मंदिर परिसरात बिबट्या दिसल्याचा दावा दत्ता ढगे या लाईनमनने केला. गजबजलेल्या वस्तीत तो आला कसा, असा प्रश्न माजी नगरसेविका स्मिता घोगरे, दिलीप थोरात, सागर नीळकंठ, विकास कुलकर्णी, श्याम लहाने, आशा जाधव आदींनी केला. परंत. जेव्हा श्याम लहाने यांनी सीसीटीव्ही फुटेज बघितले तेव्हा खरोखरच बिबट्याचे दर्शन झाले. भिंतीवरून तो नाल्याकडे दाट झाडाझुडूपाकडे जाताना दिसतो. सिडको एन १ परिसरातील काळ्या गणपती मंदिरामागे २०१९ मध्येही एका बिबट्याने थरकाप उडवला होता. ३ डिसेंबर २०१९ रोजी पहाटे बिबट्या दिसला होता, त्याला साडेनऊ तासांनी जेरबंद करण्यात यश आले होते. त्यानंतर आता उल्कानगरीत बिबट्या दिसला.
.jpg)
