तुझ्या भावाला कापून मारले, तसे तुलाही कापू... मुजीब डॉनच्या साथीदारांची इम्रानच्या भावाला घरासमोर येऊन धमकी!; समतानगरातील धक्कादायक घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : रिक्षाचालक इम्रान सय्यद शफिक सय्यद (वय ३८, रा. सादातनगर) याची रेल्वेस्टेशन उड्डाणपुलाखाली सिल्क मिल कॉलनीजवळ १ ऑक्‍टोबरला रात्री साडेआठच्या सुमारास कारमधून पाच ते सहा जणांनी सिनेस्टाइल निर्घृण हत्‍या केली होती. या खुनाच्या घटनेनंतर मारेकऱ्यांची हिंमत इतकी वाढली, की त्यांनी इम्रानच्या घरासमोर जाऊन आणखी एका हत्येची धमकी दिली. ४ ऑक्टोबरला रात्री ८ वाजता समतानगरमध्ये हा प्रकार घडला असून, सोमवारी (६ ऑक्‍टोबर) क्रांती चौक पोलिसांनी ६ जणांच्या टोळक्याविरुद्ध गुन्हा दाखल केला आहे.

या प्रकरणात सय्यद सलमान सय्यद शफीक (वय ३५, रा. मोहमदीया मशिदीजवळ, समतानगर) याने तक्रार दिली आहे. तक्रारीनुसार, ३१ मे रोजी झालेल्या हाणामारीचा राग मनात धरून सय्यद मुजिब मोहिनोद्दीन उर्फ मुजिब डॉन व त्याच्या साथीदारांनी सलमानचा मोठा भाऊ इम्रानची हत्या केली. त्यामुळे सातारा पोलिसांनी मुजिब डॉन व त्याच्या दोन साथीदारांना अटक केली आहे. ४ ऑक्‍टोबरला रात्री ८ च्या सुमारास सलमान, त्याच्या मावशीचा मुलगा अवेजखान अजमत खान व मावशी नजमा बेगम अजमत खान हे घरासमोर असताना मुजिब डॉनचे सहकारी सय्यद मोहसिन सय्यद मोईनो‌द्दीन, सय्यद शादाब मोईनो‌द्दीन, शाहरुख कुरेशी (दादा), सय्यद मुखतार सय्यद मुजीब, अंतीक कुरेशी (दादा), अनवर कुरेशी ऊर्फ सिकंदर डॉन (सर्व रा. अन्सार कॉलनी, पडेगाव) यांनी येऊन जसे तुझ्या भावाला कापून मारले तसे तुलाही कापून मारून टाकू. आम्हाला कोणी काही करू शकत नाही. तुम्ही कोणत्याही पोलीस ठाण्यात तक्रार द्या. पोलीस आमचे काही करू शकत नाही, असे धमकावले व शिवीगाळ केली. अधिक तपास पोलीस निरीक्षक सुनील माने करत आहेत.