मोठी बातमी : सेवानिवृत्ताला डिजिटल अरेस्ट करून सव्वा दोन कोटी उकळले!; वडगाव कोल्हाटीतून सायबर भामट्याला तामिळनाडू पोलिसांनी उचलले, शहर गुन्हे शाखेने केली मदत...

छत्रपती संभाजीनगर (मेट्रोपोलिस पोस्ट वृत्तसेवा) : सध्या देशभर डिजिटल अरेस्ट हे सायबर भामट्यांचे कुटील कारस्थान चर्चेत आहे. हे रॅकेट छत्रपती संभाजीनगरातील वाळूज एमआयडीसी परिसरातून चालत असल्याचे गेल्या जुलै महिन्यात समोर आले होते. तामिळनाडूच्या पोलिसांनी २९ जुलैला छत्रपती संभाजीनगरात येऊन दोन सायबर भामट्यांना अटक केली होती. त्यानंतर पुन्हा आज, १० ऑक्‍टोबरला तामिळनाडूचे पोलीस छत्रपती संभाजीनगरात आले होते. त्यांनी तिसऱ्या भामट्याला उचलले आहे.

अक्षय सुंदरराव वाघमोडे (वय ३२, रा. साईश्रद्धा पार्क, वडगाव कोल्हाटी, वाळूज एमआयडीसी परिसर) असे या सायबर भामट्याचे नाव आहे. त्‍याला शहर गुन्हे शाखेचे संदीप शिंदे आणि पोलीस अंमलदार राहुल भंगाळे यांच्या मदतीने तामिळनाडूच्या पोलिसांनी घरातून पकडले. यापूर्वी तामिळनाडूच्या पोलिसांनी श्रीकांत सुरेशराव गायकवाड  (वय ३४, रा. वडगाव कोल्हाटी) आणि नरेश कल्याणराव शिंदे (वय २६, रा. आर्यन सिटी, तिसगाव, वाळूज एमआयडीसी परिसर) या दोघांना अटक करून नेले आहे. त्‍यानंतर अक्षय वाघमोडे निष्पन्न झाला. वडगाव कोल्हाटीतून देशभर अशाप्रकारे डिजिटल अरेस्टचे रॅकेट चालविण्यात आल्याची दाट शक्‍यता आहे.

सूत्रांच्या माहितीनुसार, चेन्नईच्या तिरूवनचेरी येथील सेवानिवृत्त कर्मचारी प्रभाकरन कुंधू चंद्रन रुवी यांना दिल्ली सायबर पोलीस असल्याचे भासवून भामट्यांनी कॉल केला. कॅनरा बँकेतील खात्यातून मनी लॉन्ड्रिंग झाल्याचे सांगून त्यांना कारवाईची धमकी देण्यात आली. त्यानंतर त्‍यांना डिजिटल अरेस्ट करण्यात आले. या अटकेदरम्यान त्यांच्याकडून तब्बल दोन कोटी २७ लाख २४ हजार ९०० उकळण्यात आले होते. प्रभाकरन यांनी पोलिसांत तक्रार केली. तांत्रिक सुरू असताना तामिळनाडू पोलिसांना छत्रपती संभाजीनगरमधून भामटे रॅकेट हाताळत असल्याचे कळले. २९ जुलैला त्‍यांनी छत्रपती संभाजीनगरला येत स्थानिक पोलिसांची मदत घेत श्रीकांत गाडेकर व नरेश शिंदे या भामट्यांना अटक केली होती.

हे दोघे दिवसभर देवळाई परिसरात हॉटेलमध्ये खोली बुक करून डिजिटल अरेस्टचा खेळ खेळत होते. त्‍यांच्या खात्‍यात १ कोटी ३६ लाख रुपये असल्याचे समोर आले होते. दोघेही इंजिनिअर असून, काही दिवस त्‍यांनी खासगी कंपनीत नोकरीही केली होती. घरातून बाहेर पडताना नोकरीवर जात असल्याचे सांगत होते. आता त्‍यांचा तिसरा साथीदारही गजाआड झाल्याने डिजिटल रॅकेटचा पर्दाफाश करण्यात पोलिसांना यश आले आहे. असे असले तरी त्‍यांचे आणखीही साथीदार असू शकतात, अशी शक्‍यताही व्यक्‍त केली जात आहे.