स्टील कंपनीच्या मॅनेजरचा चाकूने गाल फाडला, कांचनवाडीतील बंटी गुंडाने घडवला थरार

By City News Desk

On 09 Oct 2025

स्टील कंपनीच्या मॅनेजरचा चाकूने गाल फाडला, कांचनवाडीतील बंटी गुंडाने घडवला थरार

"छत्रपती संभाजीनगर सिटी न्यूज' वेबसाईटवर प्रसिद्ध होणारा मजकूर, छायाचित्रे 'मेट्रोपोलिस पोस्ट' वृत्तपत्राच्या परवानगीशिवाय पूर्णतः किंवा अंशतः कॉपी करण्यास सक्त मनाई आहे. असे करताना कुणीही आढळल्यास कोणतीही वेगळी नोटीस न देता कायदेशीर कारवाई केली जाईल याची नोंद घ्यावी. - संपादक, मेट्रोपोलिस पोस्ट वृत्तपत्र

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : कारला धडक दिल्याबद्दल जाब विचारणे कंपनी व्यवस्थापकाच्या जिवावर बेतले. माझ्या वडिलांना का बोलतो, असे म्हणून गावगुंडाने त्यांचा चाकूने गाल फाडला. ही धक्कादायक घटना कांचनवाडीत रविवारी (५ ऑक्‍टोबर) सायंकाळी घडली. या प्रकरणी बंटी नामक गुंडाविरुद्ध सातारा पोलिसांनी हत्येच्या प्रयत्नाचा गुन्हा दाखल केला आहे.

चितेगाव येथील एका स्टील कंपनीत व्यवस्थापक असलेले सचिन ठोसरे (वय ४५) नक्षत्रवाडीत राहतात. मुलांना ट्यूशन लावण्यासाठी रविवारी कांचनवाडी परिसरात कारने आले होते. याच वेळी समोरून आलेल्या अन्य कारने त्यांच्या वाहनाला जोरदार धडक दिली. काहीशा वादानंतर ठोसरे परत घरी निघाले. धडक देणाऱ्या कारचा (क्र. एमएच ३७ जी ३७७५) चालक सायंकाळी ५.३० वाजता त्यांना कांचनवाडीतील वाईन शॉपसमोर दिसला. या वेळी ठोसरे यांनी त्याला गाठून पुन्हा जाब विचारला.

याच वेळी त्या व्यक्तीचा गुंड मुलगा बंटी तेथे दाखल झाला. माझ्या वडिलांना का बोलतो, असे म्हणत त्याने ठोसरे यांना मारहाण सुरू केली. एवढेच नव्हे तर खिशातून चाकू काढून ठोसरे यांच्यावर हल्ला चढवला. दोन वार चुकवणाऱ्या ठोसरे यांच्या चेहऱ्यावर मात्र तिसऱ्या वाराने गंभीर जखम झाली. गाल चिरला गेल्याने पुढे रुग्णालयात त्यांच्यावर शस्त्रक्रिया करावी लागली. रुग्णालयात प्रकृती सुधारल्यानंतर मंगळवारी (७ ऑक्‍टोबर) त्यांनी सातारा पोलिसांत तक्रार दिली.