SHOCKING! आठवीत शिकणाऱ्या १२ वर्षीय मुलीची अपार्टमेंटच्या चौथ्या मजल्यावरून उडी घेऊन आत्‍महत्‍या!!; छत्रपती संभाजीनगर हादरले

छत्रपती संभाजीनगर (सीएससीएन वृत्तसेवा) : आठवीत शिकणाऱ्या १२ वर्षीय मुलीने अपार्टमेंटच्या चौथ्या मजल्यावरून उडी घेत आत्महत्या केल्याने छत्रपती संभाजीनगरात खळबळ उडाली आहे. आदिश्री त्र्यंबक जाधव असे या मुलीचे नाव आहे. सोमवारी (१४ ऑक्‍टोबर) पहाटे पाचला घराला बाहेरून कुलूप लावून घेत आदिश्रीने हे धक्कादायक पाऊल उचलले.

बीड बायपास परिसरातील स्वप्नपूर्ती इन्क्लेव्ह सोसायटीतील रो हाऊसमध्ये आई व मोठ्या भावासह आदिश्री राहत होती. घरापासून जवळच असलेल्या आयसीएसई बोर्डाच्या शाळेत शिकत होती. शाळेला सुट्टी असल्याने रविवारी दिवसभर घरीच होती. जेवणानंतर अभ्यास करून झोपायला गेली. पहाटे जवळपास ४:५० च्या सुमारास ती घराबाहेर पडली. बाहेरून लॅच लॉक लावून चावी खिडकीतून घरात टाकली. त्यानंतर रघुनारायण अपार्टमेंटच्या पहिल्या मजल्यावरून एकटी जाताना पाचला ती सीसीटीव्ही कॅमेऱ्यात कैद झाली आहे.

लिफ्टचे बटन दाबून पुन्हा पायऱ्यांनी गच्चीवर गेली. तिथून थेट खाली उडी घेतली. इमारतीवरून मुलगी कोसळल्याचे लक्षात आल्याने परिसरात एकच खळबळ उडाली. आदिश्रीला तिला रुग्णालयात दाखल केले. मात्र, डॉक्टरांनी मृत घोषित केले. आदिश्रीचे वडील मथुरा येथे भारतीय सैन्यात लेफ्टनंट कर्नलसह अस्थिरोगतज्‍ज्ञ होते. त्‍यांचे हृदयविकाराच्या धक्क्याने २०१६ मध्ये निधन झालेले आहे. आई बीएचएमएस डॉक्‍टर आहेत. मोठा भाऊ बारावीत आहे. आदिश्रीला खेळाची आवड होती. जिन्मॅशियममध्ये तिने राज्यस्तरीय प्रतिनिधित्व केले. आत्महत्येपूर्वी कुठलाही मजकूर लिहिलेला आढळला नाही, असे पोलीस निरीक्षक संग्राम ताटे यांनी सांगितले. त्‍यामुळे तिच्या आत्‍महत्‍येचे कारण शोधणे मोठे आव्हान बनले आहे.

अल्पवयीन मुलांच्या आत्‍महत्‍या वाढल्याने चिंता…
-उत्तरानगरातील १७ वर्षीय रजत जयकुमार देवदानी याने ८ ऑक्टोबरला धावत्या रेल्वेसमोर स्वतःला झोकून देत आत्महत्या केली.
-मुकुंदवाडीतील १६ वर्षीय त्रिपुरा जगन अवटे हिने ट्यूशनवरून घरी परतताच १२ ऑक्टोबरला गळफास घेतला.
-रेल्‍वेस्टेशन रोड, स्‍नेहनगरातील १७ वर्षीय साहिल नांदेडकर या पोलीस उपायुक्‍त शीलवंत नांदेडकर यांच्या मुलाने १३ ऑक्टोबरला घरात गळफास घेतला.
अल्पवयीन मुलांच्या वाढत्‍या आत्‍महत्‍यांनी शहर चिंतित झाले आहे.