रेल्वेस्टेशन रोडवरील हॉटेल अशोक बारमध्ये तरुणांमध्ये राडा; १७ वर्षीय मुलाला चाकूने भोसकले!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : दारूची लत लागलेल्या १७ वर्षीय मुलाने रेल्वेस्टेशन रोडवरील हॉटेल अशोका बार गाठले. तिथे त्याच्याच भागात राहणाऱ्या तरुणाकडे त्याने दारूसाठी पैसे मागितले. त्यावरून दोघांत वाद होऊन त्या तरुणाने मित्रांसोबत मिळून मुलाला पोटात चाकूने भोसकले. रक्‍तबंबाळ होऊन कोसळलेल्या मुलाला पोलिसांनी वेळीच घाटी रुग्णालयात नेल्याचे प्राण वाचले. या प्रकरणात सोमवारी (२७ ऑक्‍टोबर) वेदांतनगर पोलिसांनी चार हल्लेखोरांविरुद्ध गुन्हा दाखल केला आहे.

आनंद (अल्ववयीन असल्याने नाव बदलले आहे) उस्मानपुऱ्यातील कबीरनगरमध्ये राहतो. तो आई-वडील, भाऊ-वहिनीसह राहतो. बिगारी काम करतो. ७ ऑक्‍टोबरला दुपारी पावणेचारच्या सुमारास तो दारू पिण्यासाठी रेल्वेस्टेशन रोडवरील हॉटेल अशोका बार येथे गेला होता. त्याठिकाणी त्याला कबीरनगर भागातच राहणारा सोनु ऊर्फ निखिल खरात भेटला. तोदेखील त्याचा मित्र समाधान व समाधानचा एक मित्र यांच्यासह दारू पिण्यासाठी आला होता. ते ओळखीचे असल्याने आनंदने त्यांना दारू पिण्यासाठी पैसे मागितले.

त्यावरून सोनू ऊर्फ निखिल, समाधान व समाधानच्या मित्राने आनंदला शिवीगाळ करून हाताचापाटाने मारहाण केली. त्यानंतर काही वेळाने निखिलने त्याचा आणखी एक मित्र अवि देवडे याला फोन करून त्याठिकाणी बोलावून घेतले. अवि देवडे त्याठिकाणी आला. त्यानेही शिवीगाळ करून दमदाटी करून हाताचापटाने मारहाण केली. त्यानंतर अवि देवडे आनंदला हॉटेल अशोकाच्या दरवाजाजवळ पुन्हा हाताचापटाने मारहाण करू लागला. हॉटेलमधील कर्मचाऱ्यांनी त्यांचे भांडण सोडवण्याचा प्रयत्न केला.

त्या सर्वांनी त्या कर्मचाऱ्यांनाही दमदाटी केली.  अवि देवडे याने त्याच्या कमरेला असलेला चाकू काढून आनंदच्या पोटात भोसकले. त्यामुळे आनंद गंभीर जखमी होऊन कोसळला. त्यानंतर ते पळून गेले. पोलिसांना घटनेची माहिती मिळताच त्यांनी हॉटेल अशोक बारवर येत आनंदला घाटी रुग्णालयात दाखल केले. इतके दिवस आयसीयूमध्ये उपचार घेतल्यानंतर सोमवारी (२७ ऑक्‍टोबर) पोलिसांनी त्याचा जबाब नोंदवला. त्यावरून पोलिसांनी निखिल, अवि, समाधान व समाधानचा एक मित्र अशा चौघांविरुद्ध गुन्हा दाखल केला आहे. अधिक तपास पोलीस उपनिरीक्षक वैभव मोरे करत आहेत.