अरेरे काय हेऽऽ... भररस्‍त्‍यात दारू पिऊन २ महिलांची फ्री स्‍टाइल हाणामारी!; मोंढा नाका उड्डाणपुलाजवळील धक्कादायक घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : भररस्‍त्‍यात दारू पिऊन २ महिलांनी धिंगाणा घालत आपसात जोरदार हाणामारी सुरू केली. पोलिसांनी घटनास्‍थळी येत दोघींना ताब्‍यात घेतले व त्‍यांच्याविरुद्ध गुन्हा दाखल केला आहे. ही धक्कादायक घटना जालना रोडवरील मोंढा नाका उड्डाणपुलाजवळ गुरुवारी (११ सप्टेंबर) मध्यरात्री १२ च्या सुमारास घडली. आरती प्रकाश कांबळे (वय ३०, रा. उस्मानपुरा, पीरबाजारजवळ) व प्रतीक्षा बाळासाहेब भादवे (वय २५, रा.उस्मानपुरा, पीरबाजारजवळ) अशी दोघींची नावे असल्याचे पोलिसांनी सांगितले.

जिन्सी पोलीस ठाण्यात पोलीस अंमलदार लोभाजी संभाजी सुक्रे यांनी दोन्ही महिलांविरुद्ध तक्रार दिली. दोघी दारूच्या नशेत तर्रर्र झालेल्या होत्या. एकमेकींना शिवीगाळ करून त्यांनी आधी तेथेच असलेल्या डॉमिनोज पिझ्झा दुकानाची तोडफोड सुरू केली. दुकानाच्या काचा फोडल्या. दुकानाच्या पायऱ्यांवर एकमेकींशी हुज्जत घातल्यानंतर त्या मुख्य रस्त्यावर आल्या. मग त्यांची हाणामारी सुरू झाली. जवळपास अर्धा ते एक तास हा प्रकार सुरू होता. नागरिकांची गर्दी जमली होती. त्‍याचवेळी वरिष्ठ पोलीस निरीक्षक शिवाजी बुधवंत रात्रगस्तीवर होते.

मोंढा नाका उड्डाणपुलावरून जात असताना पुलाखाली गोंधळ सुरू असल्याचे लक्षात येताच ते पुलाखाली आले. शिवाजी बुधवंत यांनी महिला अंमलदारांना बोलावले. नंतर दोन्ही महिलांना शासकीय वाहनातून घाटी रुग्णालयात नेऊन वैद्यकीय तपासणी केली असता त्‍या दारू पिलेल्या असल्याचे समोर आले. महिलांसोबत एक चिमुकली मुलगी होती. दोघी हाणामारी करत असताना चिमुकली भांबावून रडत होती. महिलांना मात्र कसलीही शुद्ध नव्हती. एक महिला तर अक्षरशः रस्त्यावरच लोळत होती.

टीव्ही सेंटरच्या आनंदनगरीत महिलांत हाणामारी
टीव्ही सेंटर भागात सध्या आनंदनगरी सुरू असून, बुधवारी (१० सप्टेंबर) रात्री ९ च्या सुमारास या ठिकाणी काही महिलांतदेखील तुंबळ हाणामारी झाली. या हाणामारीचा व्हिडीओ सोशल मीडियावर व्हायरल झाला आहे. मात्र पोलिसांत तक्रार देण्यात आलेली नाही. याशिवाय जालना रोडवरील मुकुंदवाडी चौकाच्या समोरच्या बाजूवर दोन दारूड्यांनीही रस्त्यावरच लोटांगण घेतल्याने काही काळ वाहतुकीची कोंडी झाली होती. हा प्रकार गुरुवारी (११ सप्टेंबर) रात्री ९ च्या सुमारास घडला. सिडको एमआयडीसी पोलिसांनी दोघांना ताब्‍यात घेत वाहतूक सुरळीत केली. याही घटनेचा व्हिडीओ सोशल मीडियावर व्हायरल होत आहे.