मनपाच्या अनागोंदी कारभाराचा बळी!; ३ महिन्यांपासून वेतन नसल्याने टेंशनमध्ये कंत्राटी कर्मचाऱ्याचा हार्टॲटॅकने मृत्यू!!

By City News Desk

On 13 Oct 2025

मनपाच्या अनागोंदी कारभाराचा बळी!; ३ महिन्यांपासून वेतन नसल्याने टेंशनमध्ये कंत्राटी कर्मचाऱ्याचा हार्टॲटॅकने मृत्यू!!

"छत्रपती संभाजीनगर सिटी न्यूज' वेबसाईटवर प्रसिद्ध होणारा मजकूर, छायाचित्रे 'मेट्रोपोलिस पोस्ट' वृत्तपत्राच्या परवानगीशिवाय पूर्णतः किंवा अंशतः कॉपी करण्यास सक्त मनाई आहे. असे करताना कुणीही आढळल्यास कोणतीही वेगळी नोटीस न देता कायदेशीर कारवाई केली जाईल याची नोंद घ्यावी. - संपादक, मेट्रोपोलिस पोस्ट वृत्तपत्र

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : ३ महिन्यांपासून वेतन नाही, त्यामुळे कुटुंबाचा उदरनिर्वाह करताना होणारी ओढाताण आणि वाढत असलेली चिंता... यामुळे हार्टॲटॅक येऊन महापालिकेतील कंत्राटी कर्मचारी दिनेश आनंद खरात (वय ३२) यांचा रविवारी (१२ ऑक्टोबर) रात्री मृत्‍यू झाला. महापालिकेच्या अनागोंदीचा कारभाचा हा बळी मानला जात आहे.

खरात हे उस्मानपुऱ्यात कुटुंबासह राहत होते. ते महापालिकेच्या मलेरिया विभागात फवारणी कर्मचारी होते. छातीत दुखत असल्याने कुटुंबीयांनी त्यांना घाटी रुग्णालयात दाखल केले. मात्र डॉक्‍टरांनी त्यांना तपासून मृत घोषित केले. रविवारी प्रतापनगर स्मशानभूमीत त्यांच्यावर अंत्यसंस्कार झाले. त्यांच्या पश्चात पत्नी, दोन मुले असा परिवार आहे. गेल्या तीन महिन्यांपासून महापालिकेतील कंत्राटी कर्मचाऱ्यांना वेतन देण्यात आलेले नाही. त्यामुळे कर्मचाऱ्यांची उपासमार सुरू आहे. उसनवारी वाढत चालली असून, आता तर त्यांना कुणी उसनेही देण्यास कचरत आहेत. अशा परिस्थितीत कुटुंबाचा उदरनिर्वाह कसा करायचा, असा प्रश्न त्यांना पडला आहे. वेतन नसल्याने टेन्शनमुळेच खरात यांना हार्टॲटॅक येऊन मृत्यू झाला, असा आरोप कंत्राटी कामगार संघटनेचे अध्यक्ष शेख हकीम यांनी केला आहे.