छत्रपती संभाजीनगर (सीएससीएन वृत्तसेवा) : आजच्या तरुण पिढीने प्रेमाचा अर्थच बदलून टाकला आहे. शारीरिक आकर्षणाला प्रेम समजून बसल्याने त्यातून निर्माण होणाऱ्या अडचणींमुळे थेट प्राणत्यागासारखे टोकाचे पाऊल उचलण्यासही ही पिढी मागेपुढे पाहत नाही… मंगळवारी (२२ ऑक्टोबर) वाळूज औद्योगिक वसाहत परिसरात असाच प्रकार समोर आला. प्रियकराच्या हट्टाला नकार दिल्यानंतर तो अधिकच आग्रही झाल्याने आणि या गोष्टीची चर्चा मित्र-मैत्रिणींत झाल्याने तरुणीने एका मैत्रिणीला सांगून आत्महत्येसाठी थेट तलावाकडे धाव घेतली. तिच्या मैत्रिणीने प्रसंगावधान राखून तातडीने डायल ११२ ला कॉल केल्याने वेळीच पोलिसांनी धावून तरुणीला वाचवले…. वाळूज एमआयडीसी पोलिसांनी तरुणीला वाचवल्यानंतर तिचे समुपदेशन केले. त्यानंतर तिने चूक झाल्याची कबुली दिली आणि जीव वाचवल्याबद्दल पोलिसांना थँक्यूही म्हणाली.
नक्की काय झाले?
वाळूज येथील कीर्ती (नाव बदलले आहे) बारावीत शिकते. तिची अंकितसोबत (नाव बदलले आहे) ओळख, मैत्री आणि नंतर प्रेम झाले. प्रेमात दोघे आकंठ बुडाल्यानंतर त्याने तिच्याकडे एकांतात भेटण्यासाठी आग्रह सुरू केला. तिने त्याला समजावून सांगितले. पण तो न ऐकता अधिकच हट्टाला पेटला. त्याच्या वागण्याचा तिला त्रास होऊ लागला. याची चर्चा मित्र-मैत्रिणींत झाली. त्यामुळे ती टेंशनमध्ये आली.
मंगळवारी (२२ ऑक्टोबर) दुपारी दोनला तलावात आत्महत्या करायला जाते, असे मैत्रीण काया (नाव बदलले आहे) हिला सांगून ती थेट तलावाच्या दिशेने गेली. त्यामुळे घाबरून गेलेल्या कायाने डायल ११२ ला कॉल केला. पोलीस अंमलदार मंगेश जाधव, कल्याण खामकर यांनी तातडीने धाव घेतली. तलावाकडे निघालेल्या कीर्तीला रोखून तिची समजूत काढली. तिला पोलीस ठाण्यात आणले. पोलीस उपनिरीक्षक भाग्यश्री शिंदे यांनी कीर्तीचे समुपदेशन करत तिचे मत परिवर्तन केले. त्यामुळे कीर्तीलाही चुकीची जाणीव होऊन तिने माफी माग प्राण वाचविल्याबद्दल पोलिसांचे आभार मानले. यानंतर तिला घरी पाठविण्यात आल्याचे सूत्रांनी सांगितले.
.jpg)
.jpg)
.jpg)
