तुम्ही व्हॉट्‌स ॲप ग्रुपचे ॲडमिन असाल तर छत्रपती संभाजीनगरच्या सायबर पोलिसांचा इशारा तुमच्यासाठी..., काय म्हणाले, कशाबद्दल केले अलर्ट...

छत्रपती संभाजीनगर (मेट्रोपोलिस पोस्ट वृत्तसेवा) : महापालिका निवडणुकीच्या पार्श्वभूमीवर छत्रपती संभाजीनगर शहर पोलिसांच्या सायबर विभागाने ऑनलाइन गस्त वाढवली आहे. सोशल मीडिया प्लॅटफॉर्म फेसबुक, इन्स्टाग्राम, व्टिटर, व्हॉट्‌स ॲपचा वापर करून अनेक समाजकंटक दोन समाजांत तेढ निर्माण करण्याचा प्रयत्न करत आहेत. त्याला पायबंद घालण्यासाठी शहर सायबर पोलीस सतर्क झाले आहेत. गेल्या काही दिवसांत २७ आक्षेपार्ह पोस्ट हटविल्याची माहिती सायबर पोलीस ठाण्याचे पोलीस निरीक्षक सोमनाथ जाधव यांनी पत्रकारांना दिली.

वरिष्ठ अधिकाऱ्याच्या नेतृत्वाखाली नऊ कर्मचाऱ्यांचे विशेष पथक सायबर पोलिसांनी तैनात केले आहे. या पथकाकडून सोशल मीडियावर कोण काय टाकते, त्याचा काय परिणाम होऊ शकतो, याचा अभ्यास केला जात आहे. आचारसंहितेचे उल्लंघन झाले किंवा समाजांत तेढ निर्माण होण्याची शक्यता वाटल्यास लगेचच पोस्ट डिलीट करण्यासह त्या पोस्ट टाकणाऱ्याला शोधले जात आहे. त्या पोस्टला लाइक आणि कमेंट करणाऱ्यांचाही बंदोबस्त केला जात आहे.

अशांविरुद्ध गुन्हा नोंदविणार असल्याचे पोलिसांकडून सांगण्यात आले. त्यामुळे कोणतीही पोस्ट, बातमी पुढे फॉरवर्ड करण्यापूर्वी सत्यता तपासणे आवश्यक आहे. जात, धर्म किंवा पक्षाबद्दल अवमानकारक टिपण्णी, द्वेषपूर्ण मजकूर पोस्ट करणे कायद्याच्या जंजाळात अडकवू शकते. व्हॉट्स ॲप ग्रुपवर कुणी काहीही टाकले तरी, त्याच्यासोबत ॲडमिनही अडचणीत येणार आहे. ग्रुप्सवर ‘ओन्ली ॲडमिन’अशी  सेटिंग करावी, असे आवाहनही पोलिसांनी केले आहे. पोलीस निरीक्षक सोमनाथ जाधव म्हणाले, की आम्ही प्रत्येक पोस्टवर लक्ष ठेवून आहोत. नागरिकांनीही अशी पोस्ट दिसली तर आम्हाला ११२ हेल्पलाइन क्रमांकावर संपर्क करावा, असे आवाहन त्यांनी केले.

(छत्रपती संभाजीनगर महापालिका निवडणुकीसंदर्भातील महत्त्वाच्या, ताज्या, विश्वासार्ह बातम्या वाचण्यासाठी कृपया मेट्रोपोलिस पोस्ट वृत्तपत्राचा व्हॉट्‌स ॲप ग्रप जॉइन करा, पुढील लिंकवरून : https://chat.whatsapp.com/G5NOi6zEjdUFpcmp6qRgKB )