छत्रपती संभाजीनगर (सीएससीएन वृत्तसेवा) : छत्रपती संभाजीनगरच्या विभागीय क्रीडा संकुलाचे २१ कोटी ५९ लाख रुपये हडपणाऱ्या हर्षकुमार अनिल क्षीरसागर (वय २१, मूळ रा. अंबड, जि. जालना ह. मु. बीड बायपास) याची आई मनीषा, वडील अनिल क्षीरसागर आणि मामा हितेश शार्दूल या तिघांना रविवारी (५ जानेवारी) न्यायालयाने ७ जानेवारीपर्यंत पोलीस कोठडी सुनावली. हर्षकुमारने आनंदवाडी, परतूर (जि. जालना) येथे सीतानंद पार्कमध्ये १ हजार ६४१ चौरस फुटांचा प्लॉट क्र. ९ घेतल्याचे गुन्हे शाखेने उघडकीस आणले असून, त्याचा पावती करारनामा जप्त केला आहे. याशिवाय हर्षकुमारने शेअर बाजारातही एक कोटीची गुंतवणूक केल्याचे समोर आले आहे. मैत्रीण अर्पिता वाडकर (वय २१) हिच्यासोबत त्याने परदेश वाऱ्याही केल्या. रशिया आणि इंडोनेशिया या देशांची सफर करत त्यांनी ‘मौजमजा’ केली.
गुन्हे शाखेने घोटाळा प्रकरणात आजपर्यंत हर्षकुमारची सहकारी कंत्राटी लिपिक यशोदा शेट्टी, तिचा पती बी. के.जीवन, हर्षकुमार ज्या व्हेव मल्टिसर्व्हिसेस कंपनीमार्फत नियुक्त होता, त्या कंपनीचा मॅनेजर नागेश डोंगरे, हर्षकुमारची मैत्रीण अर्पिता वाडकर, आई मनीषा क्षीरसागर, वडील अनिल क्षीरसागर, मामा हितेश शार्दूल या आठ जणांना अटक केली आहे. यशोदा, जीवन, नागेश आणि अर्पिता यांची न्यायालयीन कोठडीत रवानगी करण्यात आली असून, हर्षकुमार आणि त्याचे कुटुंबीय पोलीस कोठडीत आहेत.
पोलिसांनी हर्षकुमार आणि त्याच्या कुटुंबीयांनी खरेदी केलेल्या एक कोटींच्या सोन्यापैकी ५० लाखांचे सोने पोलिसांनी जप्त केले आहे. उस्मानपुऱ्यातील गुरुकृपा ज्वेलर्स, पीएनजी ज्वेलर्स, चंदूकाका सराफ आदी ठिकाणाची लाखोंची बिले पोलिसांनी जप्त केली आहेत. हितेश शार्दूलने घोटाळ्यातील रकमेतून मालेगावात घर घेतले असून स्कूटरही खरेदी केली होती. त्याने पत्नी पूजाच्या नावावर पीएनजी ज्वेलर्समधून १ लाख ७८ हजार रुपयांचे सोने खरेदी केली.
हर्षकुमारने स्वतःच्या खात्यावरून अन्य खात्यांशी केलेले व्यवहार पोलिसांच्या रडारवर आले आहेत. एखाद्याला १० रुपये पाठवले असतील तरी त्या बँक खातेदाराचीही चौकशी होणार आहे. हर्षकुमारने शेअर बाजारात एक कोटीची गुंतवणूक केली आहे. गुंतवणुकीसाठी त्याने त्याच्या एका जवळच्या मित्राची मदत घेतली असल्याची माहिती समोर येत आहे. या रकमेतून त्याला किती रुपये नफा झाला याचाही तपास होणार आहे. जीवन व यशोदा यांच्या घरी हर्षकुमारच्या एचडीएफसी बँकेचा सही केलेला कोरा धनादेश सापडला.
हर्षकुमारने मैत्रीण अर्पितासोबत रशिया आणि इंडोनेशियाची सफर करून मजा केली. हर्षकुमार एकट्याने बँकॉक व अन्य तीन देशांत गेला होता. हर्षकुमारचा हिरेजडित गॉगल पोलिसांनी जप्त केला असून, त्याची किंमत १० लाख रुपये आहे. त्याच्याकडे आणखी एक इम्पोर्टेड गॉगल आहे. त्याची दांडी तुटली असल्याने तो परदेशात दुरुस्तीसाठी पाठवला होता. आतापर्यंत दहाहून अधिक महागडे चष्मे जप्त केले आहेत. महागडे कपडे आणि बुटांची खरेदीही केल्याचे तपासात समोर आले आहे. हर्षने केलेल्या प्रत्येक व्यवहाराची चौकशी केली जात असल्याची माहिती आर्थिक गुन्हे शाखेचे पोलीस निरीक्षक संभाजी पवार यांनी दिली.
.jpg)
.jpg)
.jpg)
