छत्रपती संभाजीनगर (सीएससीएन वृत्तसेवा) : कोकणवाडी ते पंचवटी रोडवरील जे टॉवरजवळील सलूनमध्ये दाढी कुणाची करायची यावरून मंगळवारी (१४ जानेवारी) दुपारी साडेतीनच्या सुमारास मोठाच राडा झाला. एका युवकावर टोळक्याने आधी वस्तऱ्याचे वार केले, नंतर रोडवर आणत सर्वांनी मिळून लाथाबुक्क्यांनी बेदम मारहाण केली. यात बेशुद्ध पडलेल्या युवकाचे डोळे थेट घाटी रुग्णालयातच उघडले. वेदांतनगर पोलिसांनी टोळक्यातील ७ जणांविरुद्ध गुन्हा दाखल केला आहे.
अमर गौतम दाभाडे (वय ३१, रा. रमानगर गल्ली नं. २, छत्रपती संभाजीनगर) याने जबाबात म्हटले आहे, की तो पत्नी व मुलाबाळांसह आनंद साबळे यांच्या घरात सन २०१८ पासून किरायाने राहतो. तो मंगळवारी (१४ जानेवारी) दुपारी साडेतीनच्या सुमारास कटिंग व दाढी करण्यासाठी पंडीत मामा यांच्या दुकानात आला होता. कटींग केल्यानंतर दाढी बाकी होती. त्याचवेळेस त्याच्या ओळखीचे क्रांतीनगरात राहणारे सुनिल श्यामराव जमधडे व त्यांचा मुलगा रोहन जमधडे कटींग दुकानात आले. सुनिल जमधडे याने अमरला खुर्चीवरून उठ, मला दाढी करायची आहे, असे सांगितले.
त्यावेळी पंडीत मामाने त्याची दाढी बाकी आहे, थोडा वेळ थांबावे लागेल, असे त्याला सांगितले. त्यावेळी अमरनेही माझी दाढी चालू आहे, असे म्हटले. याचा राग आल्याने सुनिल जमधडे याने अमरला थोबाडीत मारले. त्याचा मुलगा रोहन जमधडे हा म्हणाला, की याला मस्ती आहे, थांबा मी याच्याकडे पाहतो. असे बोलून त्याने दाढी करण्याचा वस्तरा ओढून घेत वस्तऱ्याने अमरवर सपासप वार केले. त्यामुळे अमरला रक्तबंबाळ झाला. त्यानंतर दोघांनी मिळून अमरला सलूनमधून बाहेर ओढत रोडवर आणले. रोडवर रोहित संदिप जमधडे, गोकुळ रवि जमधडे, प्रसाद सुधाकर जमधडे, चेतन भाऊसाहेब गायकवाड व प्रतिक या सर्वांनी अमरवर हल्ला चढवला. सर्वांनी लाथाबुक्क्यांनी अमरवर हल्ला केला. त्यांच्या मारहाणीत अमर बेशुद्ध पडला. त्याला नागरिकांनी घाटी रुग्णालयात दाखल केले. तपास पोलीस निरीक्षक प्रविणा यादव करत करत आहेत.
.jpg)
.jpg)
.jpg)
