छत्रपती संभाजीनगर (सीएससीएन वृत्तसेवा) : छत्रपती संभाजीनगरात शहरातील फाजलपुरा भागात एक संतापजनक घटना घडली आहे. रस्त्याने जाणाऱ्या २५ वर्षीय विवाहित युवतीला एका दारूड्याने अचानक येऊन मिठी मारली. त्यामुळे घाबरलेल्या युवतीने आरडाओरड करताच नागरिक धावून आले. त्यांनी या दारूड्याला इतके बदडले की त्याला घाटी रुग्णालयात दाखल करण्याची वेळ पोलिसांवर आली. ही घटना रविवारी (६ ऑक्टोबर) सकाळी घडली.
सूत्रांच्या माहितीनुसार, विवाहित युवती तिच्या लहान मुलासह आणि आजीसह डेअरीतून दूध घेऊन घरी परतत होती. तिने मुलाला आजीच्या कडेवर दिले. युवती सोबत चालत होती. त्याचवेळी अचानक मागून एक दारूडा आला. त्याने युवतीला मिठी मारत अश्लील चाळे सुरू केले. त्यामुळे युवती घाबरून गेली. तिने आरडओरड सुरू करताच नागरिक धावले. मोठा जमाव जमला. त्यांनी दारूड्याला चोप द्यायला सुरुवात केली.
गल्लीतून मुख्य रस्त्यावर त्याला मारत मारतच नागरिकांनी आणले. दारूड्याला रस्त्यावर आडवा केल्यावरच जमाव मारहाण करायला थांबला. सिटी चौक पोलिसांना घटनेची माहिती मिळताच त्यांनी घटनास्थळी धाव घेऊन दारूड्याला ताब्यात घेत घाटी रुग्णालयात दाखल केले. या घटनेनंतर युवतीने सिटी चौक पोलीस ठाण्यात अनोळखी दारूड्याविरुद्ध तक्रार नोंदवली आहे. पोलिसांनी गुन्हा दाखल केला असून, अधिक तपास पोलीस उपनिरीक्षक भागवत मुठाळ करीत आहेत.
घरात घुसून अल्पवयीन मुलीचा विनयभंग
दुसऱ्या एका घटनेत रविवारी सकाळी आठला २५ वर्षीय तरुणाने अल्पवयीन मुलीच्या घरात घुसून तिचा विनयभंग केला. तिने आरडाओरड केल्याने पालकांनी तरुणाला रोखले असता त्याने तुमच्या मुलीला पळवून नेईल, अशी धमकी दिली. मुलीच्या वडिलांनी जवाहरनगर पोलीस ठाण्यात तक्रार दिली आहे. त्यावरून पोलिसांनी कमलेश प्रशांत धोंगडे (वय २५, रा. अरिहंतनगर) याच्याविरुद्ध गुन्हा दाखल केला आहे.
.jpg)
.jpg)
.jpg)
