शिक्षकाचे सहशिक्षिकेशी सूत जुळले!; कधी दारू पिऊन तिच्या घरात झोपलेला दिसायचा तर कधी तिलाच घरी घेऊन यायचा…, वाळूज MIDC तील SHOCKING प्रकार, शिक्षकासह प्रेयसीविरुद्ध गुन्हा दाखल

छत्रपती संभाजीनगर (सीएससीएन वृत्तसेवा) : शिक्षकाचे सहशिक्षिकेशी सूत जुळले… दोघांच्या प्रेमाला इतकी भरती आली की तो तिला घरीही घेऊन येऊ लागला…कधी कधी तिच्याच घरी झोपू लागला… एकेदिवशी तिच्या नवऱ्याने त्‍याच्या पत्‍नीला कॉल करून सांगितले, की तुझ्या पतीचे माझ्या पत्‍नीशी अनैतिक संबंध आहेत… तुझा नवरा दारू पिऊन माझ्या घरी झोपलेला आहे… शिक्षकाच्या पत्‍नीला हे कळल्यावर धक्काच बसला… पुढे जे घडलं ते सर्वच धक्कादायक होतं… तरुण विवाहितेने वाळूज एमआयडीसी पोलीस ठाण्यात पती व त्‍याच्या प्रेयसीची तक्रार केली आहे. त्‍यावरून पोलिसांनी गुन्हा दाखल केला आहे. ही घटना वडगाव कोल्हाटी येथील साईनगरात घडली आहे.

रुपाली गजानन हराळ (रा. दिगाव, ता. कन्‍नड जि. छत्रपती ह. मु. साईनगर, वडगाव कोल्हाटी) या विवाहितेने या प्रकरणात तक्रार दिली आहे. त्‍यावरून गजानन शिवाजी हराळ (२९ रा. जवखेडा ता. कन्‍नड, ह. मु. साईनगर, वडगाव कोल्हाटी) व त्‍याची प्रेयसी अशा दोघांविरुद्ध गुन्हा दाखल केला आहे. रुपालीच्या तक्रारीनुसार, १४ एप्रिल २०१९ रोजी कन्‍नड तालुक्यातील जवखेडा येथील गजाननसोबत तिचा विवाह झाला. विवाहानंतर दोन वर्षे ती सासरी राहिली. २०२१ पती गजानन शिक्षक असल्याने ते वडगाव कोल्हाटीतील साईनगरात राहायला आले.

काही दिवसांनी त्याचे शाळेतील एका सहशिक्षकेची सूत जुळले. ८ एप्रिल २०२३ रोजी रुपालीला पतीच्या मोबाइलमध्ये एका महिलेसोबत त्याचा फोटो दिसून आला. तिने याबाबत विचारणा केली असता त्याने मैत्रीण असल्याचे सांगितले. एकेदिवशी एका व्यक्तीने रुपालीला कॉल करून सांगितले, की तुमचा नवरा दारू पिऊन माझ्या घरी झोपलेला आहे. माझ्या पत्नीसोबत त्याचे अनैतिक संबंध आहेत. तुम्हाला त्याला समजावून सांगा… हे ऐकल्यावर रुपालीला धक्काच बसला. या वेळी गजाननने माझ्याकडून चूक झाली. यापुढे असे करणार नाही, असे सांगितले.

मात्र त्याच्या वागण्यात काहीच फरक पडला नाही. उलट गजानन प्रेयसीला बोलावून घेऊ लागला. प्रेमसंबंधात रुपाली अडसर ठरत असल्याने दोघे मिळून रुपालीला मारहाण करू लागले. मुलांचा विचार करून रुपाली सर्व सहन करत होती. मात्र गजाननकडून दिवसेंदिवस गैरकृत्‍य वाढूच लागले. प्रेयसीला रात्री-बेरात्री घरी घेऊन येत असे. २३ जूनला गजानन याने रुपालीला मारहाण करून आत्महत्या करण्याची धमकी दिल्याने रुपाली माहेरी निघून गेली होती. या प्रकरणी २६ जूनला तिने वाळूज एमआयडीसी पोलीस ठाणे गाठून पती व त्याच्या प्रेयसीविरुद्ध तक्रार दिली आहे.