शाळा संचालिकेला ७२ हजारांचा गंडा; अशी घटना तुमच्यासोबतही घडू शकते, राहा अलर्ट!

छत्रपती संभाजीनगर (सीएससीएन वृत्तसेवा) : शाळा संचालिकेला ७२ हजार रुपयांचा गंडा एका भामट्याने घातल्याचा प्रकार समोर आला आहे. या प्रकरणी आज, ३ ऑक्‍टोबरला सिडको एमआयडसी पोलीस ठाण्यात गुन्हा दाखल करण्यात आला आहे.

रंजना विनय जाधव (वय ५९, रा. सिडको एन १) यांनी या प्रकरणात सिडको एमआयडीसी पोलीस ठाण्यात तक्रार दिली. सिडको एन ४ येथे त्यांची लिटील चॅम्प नर्सरी शाळा आहे. १२ ऑगस्ट २०२४ रोजी दुपारी १२ च्या त्यांना एका नंबरवरून कॉल आला. समोरचा व्यक्‍ती म्हणाला, की मॅडम मुलाच्या शाळेचे शुल्क भरायचे आहे… फोन चालू असतानाच मॅडम मेसेज आला का पहा, असे तो म्हणाला. त्यावेळी जाधव यांना आलेल्या मेसेजमध्ये ८० हजार रुपये खात्यात जमा झाल्याचे नमूद होते.

त्यानंतर तो व्यक्‍ती म्हणाला, की मॅडम चुकून तुम्हाला ८ हजार रुपयांऐवजी ८० हजार रुपये गेले आहेत. तुम्ही मला ७२ हजार रुपये परत करा. त्यामुळे जाधव यांनी त्याला फोन पेने ५० हजार आणि २२ हजार असे ७२ हजार रुपये टाकले. पैसे नजराना खातून नावाच्या खात्यावर गेल्याचे दिसल्याने जाधव यांना शंका आली. त्यांच्या शाळेत या नावाचा कुणी विद्यार्थी नसल्याचेही त्यांच्या लक्षात आले. फसवणूक झाल्याचे लक्षात येताच त्‍यांनी बँक खात्‍याचे स्टेटमेंट तपासले असता त्‍यांच्या खात्‍यात ८० हजार रुपयेसुद्धा जमा झालेले नव्हते. उलट त्‍यांचेच ७२ हजार रुपये गेले होते. फसवणूक झाल्याचे लक्षात आल्यावर त्‍यांनी पोलिसांत धाव घेतली. अधिक तपास पोलीस निरीक्षक गजानन कल्याणकर करत आहेत. (बातमीतील छायाचित्र प्रतिकात्‍मक आहे)