शहरातील नशेखोरीला आळा घालण्यासाठी पोलीस आयुक्‍तांचे मोठे पाऊल!; NDPS पथकाची स्थापना, धुरा वरिष्ठ PI गीता बागवडेंकडे

छत्रपती संभाजीनगर (सीएससीएन वृत्तसेवा) : कर्तव्यदक्ष पोलीस आयुक्‍त प्रवीण पवार यांनी शहर पोलीस दलात अमली पदार्थ विरोधी पथक (एनडीपीएस ) स्थापन केले आहे. वरिष्ठ पोलीस निरीक्षक गीता बागवडे यांची या पथकाच्या प्रमुखपदी नियुक्ती करण्यात आली आहे.

शहरात सध्या नशेखोरी वाढली असून, यामुळे गुन्हेगारीही वाढत चालली आहे. लुटमारीच्या घटना सर्रास घडत आहेत. छोट्या छोट्या कारणावरून शस्‍त्रे उपसली जात आहेत. महाविद्यालयीन तरुण, तरुणींसह अल्पवयीन मुलेदेखील नशेच्या आहारी गेल्याने या समस्येचे समूळ उच्‍चाटन करण्यासाठी पोलीस आयुक्‍त प्रवीण पवार यांनी कठोर पावले उचलली आहेत. अमली पदार्थांच्या विक्री व सेवन आटोक्यात आणण्यासाठी एनडीपीएस पथकाची स्थापना करण्यात आली आहे.

असे असेल पथक…
एनडीपीएस पथकाचे काम स्वतंत्र पोलीस ठाण्याप्रमाणे चालणार आहे. यात गीता बागवडे यांच्या नेतृत्वाखाली सहायक पोलीस निरीक्षक, पोलीस उपनिरीक्षकासह ८ ते ९ अंमलदार कार्यरत असतील. शहरात कुठेही कारवाई व त्याचा तपास करण्याचा अधिकार या पथकाला असेल.

थेट ॲक्‍शन मोडवर…
पोलीस आयुक्‍त प्रवीण पवार यांनी गीता बागवडे यांना नशेखोरांविरुद्ध कठोर कारवाईच्या सूचना केल्या आहेत. सद्यःस्थितीत शहरातील सर्वच पोलीस ठाण्यांच्या हद्दीत, प्रामुख्याने जिन्सी, सिटी चौक, मुकुंदवाडी भागात नशेखोरांच्या टोळ्या सक्रीय आहेत. सर्रास अमली पदार्थांची विक्री होते. मात्र, पोलीस सोईस्कररीत्या कानाडोळा करतात. अर्थपूर्ण संबंधामुळेदेखील कारवाईस टाळाटाळ केली जाते, असा आरोप होत असतो. त्‍यामुळे गीता बागवडे यांच्याकडून सर्वात आधी कोणत्‍या पोलीस ठाण्याच्या हद्दीत कारवायांची धडक मोहीम सुरू होते, याकडे सर्वांचे लक्ष लागले आहे.