विद्यापीठाच्या परीक्षा विभागात राड्यावरून कथित विद्यार्थी नेत्‍याविरुद्ध गुन्हा दाखल

छत्रपती संभाजीनगर (सीएससीएन वृत्तसेवा) : डॉ. बाबासाहेब आंबेडकर मराठवाडा विद्यापीठाच्या परीक्षा विभागात राडा करणाऱ्य कथित विद्यार्थी नेता प्रकाश इंगळेविरुद्ध बेगमपुरा पोलिसांनी शनिवारी (१७ ऑगस्ट) गुन्हा दाखल केला आहे.

या प्रकरणात विद्यापीठातील परीक्षा व मूल्यमापन मंडळाच्या संचालक भारती वामनराव गवळी (वय ४९) यांनी तक्रार दिली आहे. तक्रारीनुसार, २४ जुलै २०२४ रोजी दुपारी साडेबाराच्या सुमारास त्‍या त्‍यांच्या केबिनमध्ये सहकाऱ्यांसह बैठक घेत असताना सुरक्षारक्षक दुर्गा तिवारी आल्या. त्‍या म्‍हणाल्या, की प्रकाश इंगळे व त्याच्यासोबत चार ते पाच अनोळखी व्यक्‍ती विद्यापीठाच्या मुख्य इमारतीच्या प्रवेश गेटवर आले आहेत. ते अरेरावी करत आहेत…. त्‍याचवेळी अचानक प्रकाश दादाराव इंगळे व त्‍याचे साथीदार केबिनचा दरवाजा उघडून परवानगीविनाच आत आले.

गवळी यांनी प्रकाश इंगळे याला सांगितले, की या ठिकाणी गोपनीय विषयांवर बैठक चालू आहे. तुम्ही सर्व केबिनमध्ये कसे काय आले? तुम्ही भेटण्याची परवानगी घेतली आहे का? त्‍यावर प्रकाश इंगळे म्हणाला, की मला रजिस्टरमध्ये नोंद करण्याची काही गरज नाही. मी वि‌द्यार्थी नेता आहे. तुमच्या सर्व कर्मचाऱ्यांना मारेल, असे म्‍हणून तो धमकावू लागला. आरडाओरड करून, धमकावून प्रकाश इंगळे व त्‍याचे साथीदार निघून गेले. त्‍यांच्या आरडाओरड्यामुळे भीतीचे वातावरण निर्माण झाल्याने भारती गवळीही घाबरून गेल्या होत्या. त्‍यांनी बेगमपुरा पोलीस ठाण्यात प्रकाश इंगळेविरुद्ध तक्रार दिली. त्‍यावरून पोलिसांनी गुन्हा दाखल केला आहे. अधिक तपास पोलीस अंमलदार राजकुमार जाधव करत आहेत.