छत्रपती संभाजीनगर (सीएससीएन वृत्तसेवा) : छत्रपती संभाजीनगरात ड्रग्जचा पुरवठा करणारी ३० वर्षीय लेडी ड्रग्ज एजंट नगमा इमरान शेख उर्फ बाजी (३०, रा. मुंब्रा, मुंबई) हिला छत्रपती संभाजीनगर पोलिसांनी जालना जिल्ह्यातील गोलापांगरी (ता. अंबड) येथून पकडून आणले. ती ट्रॅव्हल्स चालक, क्लिनरमार्फत ड्रग्जचा पुरवठा करत होती, असे पोलीस निरीक्षक प्रवीणा यादव यांनी सांगितले.
अमलीपदार्थ विरोधी पथकाच्या प्रमुख गीता बागवडे यांनी १० ऑगस्टला पहाटे मुंबई- छत्रपती संभाजीनगर मार्गावर धावणाऱ्या सना ट्रॅव्हलच्या राजवीर ट्रॅव्हल्स बसमध्ये ड्रग्ज पकडले होते. पेडलर सिकंदर खाजा शेख (वय ३२, रा. पटेलनगर), चालक शब्बीर शेख शफी शेख (वय ४२, रा. जालना) व क्लिनर अफरोज खान निजाम खान (वय २६, रा. कटकट गेट) यांना अटक करण्यात आली होती. नगमाने शब्बीरच्या हातून मिठाईच्या बॉक्समध्ये ड्रग्स सिकंदरला देण्यासाठी पाठवले होते. शनिवारच्या रात्रीच्या एका पार्टीसाठी सिकंदरने ही ऑर्डर नगमाला दिली होती.
नगमाचे नाव पोलिसांच्या चौकशीत समोर येताच मुंबईतील ड्रग्जचे म्होरके अलर्ट झाले. नगमाला अटक केली तर आपणही गोत्यात येऊ, ही शक्यता ओळखून त्यांनी नगमाला मुंबईबाहेर पाठवले. त्यानुसार ती अंबडला आली होती. पोलीस निरीक्षक प्रवीणा यादव यांनी मुंबईला पथक पाठवल्यानंतर नगमा अंबडमध्ये असल्याचे समोर आले. त्यानंतर वेदांतनगर पोलिसांच्या पथकाने अंबड गाठून तिला ताब्यात घेतले. अटक करून न्यायालयात तिला हजर केले असता चार दिवस पोलीस कोठडीत ठेवण्याचे आदेश न्यायालयाने दिले. पोलिसांनी नगमाकडील मोबाइल जप्त केला असून या मोबाइलची स्क्रीन तिने फोडलेली आहे. त्यातील सर्व डेटाही तिने डिलिट केलेला आहे. चॅट हिस्ट्रीही क्लिअर केलेली आढळली. नगमा भाऊ, आईसह मुंबईत राहते, असे सूत्रांनी सांगितले.
.jpg)
