छत्रपती संभाजीनगर (सीएससीएन वृत्तसेवा) : वाळूज एमआयडीसीच्या बजाजनगरातील रहिवासी लघुउद्योजक, सिद्धी एंटरप्रायजेसचे मालक बालाजी नागनाथ नन्नवरे (वय ४७) यांनी आत्महत्या केल्याचे बुधवारी (२५ डिसेंबर) पहाटे समोर आल्याने खळबळ उडाली. आर्थिक अडचणीत सापडल्याने त्यांनी आत्महत्या केल्याचे सांगण्यात आले.
नन्नवरे हे देवदूत हौसिंग सोसायटीत कुटुंबासह राहत होते. ते मूळचे तुळजापूरचे होते. त्यांच्या पश्चात पत्नी, दोन मुली असून, मोठ्या मुलीचे लग्न झाले आहे तर छोटी मुलगी आठवीत आहे. बुधवारी पहाटे पाचला झोपेतून उठलेल्या पत्नीला पती बेडरूममध्ये न दिसल्याने त्यांनी स्वयंपाकघरात पाहिले असता नन्नवरे हे गळफास घेतलेल्या अवस्थेत दिसले. ते पाहून त्यांनी हंबरडा फोडला. शेजाऱ्यांनी धावून नन्नवरे यांना फासावरून उतरवून घाटी रुग्णालयात नेले. वैद्यकीय अधिकाऱ्यांनी तपासून त्यांना मृत घोषित केले. बालाजी नन्नवरे १७ वर्षांपूर्वी ते वाळूज औद्योगिक परिसरात आले होते.
सुरुवातीस ते कंपनीत काम करत होते. नंतर भाड्याच्या ठिकाणी सिद्धी एंटरप्राइजेस नावाने टूल कटिंगचे दुकान सुरू केले. सुरुवातीला त्यांना चांगला प्रतिसाद मिळाला. मात्र कोरोनामुळे आर्थिक अडचणीत सापडले. त्यानंतर ते सावरलेच नाहीत. आर्थिक विवंचनेत अडकलेल्या बालाजी यांनी पहाटे साडेतीनच्या सुमारास जवळचे मित्र, नातेवाइकांना व्हॉट्स अॅपवर मेसेज टाकला. माझा शेवटचा रामराम… असे मेसेजमध्ये लिहिले होते. मित्र व नातेवाइकांनी मेसेज पाहिला तेव्हा खूप उशीर झाला होता. गळफास घेण्यापूर्वी त्यांनी सुसाईड नोट लिहिली. ती त्यांच्या खिशात पोलिसांना सापडली. त्यात माझ्या मृत्यूसाठी कोणालाही जबाबदार धरण्यात येऊ नये, मी आर्थिक अडचणीत असल्याने आणि माझ्यावर कर्ज अधिक झाल्याने आत्महत्या करत असल्याचे म्हटले आहे.
.jpg)
