छत्रपती संभाजीनगर (सीएससीएन वृत्तसेवा) : लग्न सोहळ्याच्या आनंदात असलेल्या वरमातेच्या आनंदावर दोन चोरट्यांनी विरजण पाडले. लग्न सोहळ्यानंतर सासू-सासरच्यांना सोडायला लॉनबाहेर रोडवर आल्यानंतर अचानक दुचाकीवरून आलेल्या दोघांनी त्यांचे मंगळसूत्र आणि सोन्याचा पोहेहार असे एकूण १ लाख ६० हजार रुपयांचे दागिने हिसकावून धूम ठोकली. ही घटना गुरुवारी (२८ नोव्हेंबर) रात्री सव्वादहाच्या सुमारास सातारा परिसरातील जैन इंटरनॅशनल स्कूलजवळील लॉर्ड पॅराडाइज लॉन्सबाहेर घडली.
या प्रकरणात सौ. विजयश्री अजय व्यास (वय ५४, ह. मु. अहमदनगर, मूळ रा. सहयोगनगर, गारखेडा परिसर, छत्रपती संभाजीनगर) यांनी सातारा पोलीस ठाण्यात तक्रार दिली आहे. त्यांचे पती बीड येथील कॅनपेक्स कंपनीत प्रोजेक्ट मॅनेजर आहेत. त्यांचा मुलगा ओंकार (वय २८) याचे लग्न गुरुवारी रात्री झाले. लग्न समारंभासाठी आलेल्या चुलत सासू, सासरे व सख्ख्या सासऱ्यांना सोडण्यासाठी त्या त्यांच्यासोबत लॉनबाहेर आल्या. जैन इंटरनॅशनल स्कूलच्या बाजूला गाडीपर्यंत आल्या असता गाडीजवळ उभ्या असताना अचानक एक व्यक्ती त्यांच्याकडे आला. त्याच्या अंगात निळे जॅकेट आणि डोक्यात काळी टोपी होती. त्याने विजयश्री यांच्या गळ्यातील सोन्याचे मंगळसूत्र आणि पोहेहार बळजबरीने हिसकावून जवळच उभ्या असलेल्या व्यक्तीच्या मोटारसायकलीवर बसून दोघे पळून गेले. सातारा पोलिसांनी दोन्ही चोरट्यांविरुद्ध गुन्हा दाखल केला असून, अधिक तपास पोलीस अंमलदार देविदास राठोड करत आहेत.
.jpg)
