मेडिकल स्‍टुडंट पत्‍नीवर लावला कॅरक्टर खराब असल्याचा आरोप, सिडको एमआयडीसी पोलीस ठाण्यात गुन्हा दाखल

छत्रपती संभाजीनगर (सीएससीएन वृत्तसेवा) : मेडिकल स्‍टुंडट पत्‍नीवर कॅरक्‍टर खराब असल्याचा आरोप लावून तिला घरातून हाकलून दिल्याचा प्रकार छत्रपती संभाजीनगर शहरातील नारेगावात समोर आला आहे. तिच्या तक्रारीवरून सिडको एमआयडीसी पोलिसांनी तिचा पती, सासू, सासरा, नणंदेविरुद्ध बुधवारी (६ नोव्‍हेंबर) गुन्हा दाखल केला आहे.

२५ वर्षीय तरुणी नारेगावमध्ये आई-वडिलांकडे राहते. तिचे सासर बीड असून, पती सध्या पुण्यातील पिंपरी चिंचवड भागात राहतो. ३१ ऑक्‍टोबर २०२१ रोजी तिचे लग्न झाले. लग्नावेळी तरुणी नंदूरबार जिल्ह्यातील अक्‍कलकुवा येथे युनानी मेडिकल कॉलेजमध्ये बीयूएमएसच्या शेवटच्या वर्षात शिकत होती. कॉलेजचे शेवटचे वर्ष असल्याने शिक्षण पूर्ण झाल्यानंतर ती नांदायला येईल, असे तिच्या आई-वडिलांनी आधीच तिच्या पती आणि सासरच्या लोकांना सांगितले होते. मात्र नंतर तिच्या शिक्षणाला विरोध केला. कॉलेजमध्ये असताना ती पतीला कॉल करत असताना तो उचलत नव्हता. शिक्षण पूर्ण झाल्यानंतर ती सासरी नांदायला गेली असता पती, सासू, सासरे तिला टोमणे मारून शिवीगाळ करून त्रास देऊ लागले. तुला नांदायचे असेल तर आई-वडिलांकडून पुण्यात फ्‍लॅट घेण्यासाठी २० लाख रुपये घेऊन ये, अशी मागणी पती करू लागला. यासाठी तिला घरातून हाकलून दिले. २१ ऑक्‍टोबर २०२२ रोजी तिला डिव्‍होर्सची नोटिस पाठवली. तिच्या घरच्यांना धमकावले, की तुमच्या मुलीचे कॅरक्‍टर चांगले नाही. आम्‍ही तिला अजिबात सांभाळणार नाहीत. सांभाळायचे असेल तर आमच्या मागण्या पूर्ण करा आणि २० लाख रुपये द्या, अशी धमकी दिली. तेव्हापासून तरुणी माहेरी राहत आहे. अधिक तपास सहायक पोलीस उपनिरीक्षक विष्णू मुंढे करत आहेत.