माणुसकीला काळीमा… पैशांसाठी बहिणीला धमकी, म्हणाला, तुझ्या मुलीचा मी रेप करू टाकेल!, सिडकोतील धक्कादायक घटना

छत्रपती संभाजीनगर (सीएससीएन वृत्तसेवा) : पैशासाठी माणूस किती खालच्या स्तराला जाऊ शकतो, याचे जीवंत उदाहरण सिडको एन ६ मध्ये समोर आले आहे. भावाने बहिणीला अश्लील शिवीगाळ करून तुझ्या मुलीचा मी रेप करू टाकेल, अशी धमकी दिली. त्‍यामुळे शिक्षिकेने सिडको पोलीस ठाण्यात धाव घेऊन भावाविरुद्ध तक्रार दिली आहे. पोलिसांनी शनिवारी (३१ ऑगस्ट) या प्रकरणात गुन्हा दाखल केला.

याप्रकरणात सिडको एन ६ मध्ये राहणाऱ्या ४९ वर्षीय शिक्षिकेने तक्रार दिली आहे. त्‍यांचा भाऊ दारू पिण्याच्या सवयीचा आहे. तो नेहमी त्यांना पैसे मागत असतो. पैसे न दिल्यास शिवीगाळ करून मारहाण करण्याच्या धमक्या देतो. शुक्रवारी (३० ऑगस्ट) सकाळी ७ च्या सुमारास शिक्षिका घरी असताना त्यांच्या भावाने कॉल केला व पैसे मागू लागला. शिक्षिकेने पैसे देण्यास नकार दिला असता त्याने अश्लील शिवीगाळ सुरू केली. तुझ्या मुलीचा मी रेप करू टाकेल, अशी धमकी दिली. त्‍यामुळे घाबरून शिक्षिकेने फोन कट केला. त्यानंतर त्यांचा भाऊ शिक्षिकेच्या शाळेतही आला.

तिथे शिक्षिकेचे नाव घेऊन शिवीगाळ करू लागला. संध्याकाळी साडेचारला पुन्हा त्‍यांच्या घराबाहेर येऊन शिवीगाळ करू लागला. तो दारू पिलेला असल्याने घाबरून कुणीच घराबाहेर आले नाही. त्यामुळे त्याने पुन्हा शिक्षिकेच्या मोबाइलवर कॉल करून त्यांना अश्लील शिवीगाळ करत कुटुंबालाच जीवे मारण्याची धमकी दिली. अखेर शिक्षिकेने सिडको पोलीस ठाण्यात तक्रार दिली. त्यावरून पोलिसांनी त्‍यांच्या बालाजीनगरात राहणाऱ्या ४२ वर्षीय भावाविरुद्ध गुन्हा दाखल केला आहे. अधिक तपास पोलीस अंमलदार भानुदास खिल्लारे करत आहेत.

बहिणीविरुद्ध भावाचीही तक्रार…
दरम्यान, याच प्रकरणातील भावानेही सिडको पोलीस ठाण्यात बहीण, भाऊजी आणि भाचा व भाचाचा मित्र अशा चौघांविरुद्ध गुन्हा दाखल केला आहे. सिडको एन ५ मधील देवगिरी बँकेजवळून बोलावून भाचाने मित्रांसह मारहाण केली. त्यानंतर भाऊजी व बहिणीने येऊन मारले, असे त्‍याने तक्रारीत म्‍हटले आहे. तो आईसह सिडको पोलीस ठाण्यात आला होता.