Update : भवानीनगरात नशेखोरांचा राडा; दगडफेक, नक्की काय घडलं, STORY ON THE SPOT

छत्रपती संभाजीनगर (सीएससीएन वृत्तसेवा) : रविवारी रात्री जुना मोंढा परिसरातील भवानीनगरमध्ये नशेखोरांनी केलेल्या राड्यामुळे शहरात अफवांचे पेव फुटले होते. नशेखोरांनी एका युवकाला घरात घुसून मारहाण करत त्याच्या घरावर दगडफेक केल्याने तणाव निर्माण झाला होता. घटनास्‍थळी वरिष्ठ पोलीस अधिकाऱ्यांनी धाव घेऊन परिस्थिती नियंत्रणात आणली. दंगा काबू पथक तैनात करण्यात आले. आज सकाळपर्यंत वातावरण निवळले असून, परिसरात सध्या तणावपूर्ण शांतता आहे. अशोक थोरात यांच्या तक्रारीवरून जिन्सी पोलिसांनी मध्यरात्रीनंतर गुन्हा दाखल केला आहे. आठ जणांची नावे त्‍यांनी दिली आहेत. त्‍यांच्यासोबत आणखी काही लोक होते. त्‍यांची नावे समोर येत आहेत. त्‍यापैकी चौघांना अटकही केली आहे, अशी माहिती पोलीस उपायुक्‍त नवनीत काँवत यांनी दिली.

नक्की काय घडलं?
अशोक मारोतीराव थोरात (वय ३७, रा. जुना मोंढा भवानीनगर, शिवसेना पाटीजवळ) यांनी जिन्सी पोलीस ठाण्यात या प्रकरणात तक्रार दिली आहे. ते कुरिअर ऑफिसमध्ये कामाला आहेत. त्यांच्या घरामागे समीर शेख, रिहान, सोफीयान, आदर्श सुनके, कृष्णा गौरया व त्याचे इतर मित्र असे रोज सायंकाळी नशा करून त्यांच्या घरासमोर येऊन गप्पा मारत बसतात. अनेक वेळा त्यांना सांगूनसुध्दा ते ऐकत नाहीत. रविवारी (१३ ऑक्‍टोबर) रात्री साडेदहाच्या सुमारास ते घराबाहेर उभे असताना समीर शेख, सोफीयान शेख, आदर्श सुनके, कृष्णा गौरया आणि इतर घरासमोर रोडच्या पलीकडे उभे राहून थोरात यांच्यावर व घरावर लेझर लाईट चमकवत होते. त्यावरून थोरात यांनी त्यांना विचारणा केली, की तुम्ही लेझर लाईट का चमकावता? त्यामुळे ते सर्वजण तेथून पळून गेले. त्यानंतर काही वेळातच समीर शेख, रिहान शेख, सोफीयान शेख, आदर्श सुनके, कृष्णा गौरया, सबिया, शन्नू, बानु व त्यांच्यासोबत इतर आठ ते दहा पुरुष असे सर्वजण थोरात यांच्या घरासमोर शिवीगाळ करत आले व त्यांच्या घरात घुसले.

त्या सर्वांनी घरात दंगा करून थोरात यांना घराबाहेर ओढून नेले. त्यानंतर समीर शेख याने त्याच्या हातातील विट थोरात यांना मारली. पुन्हा दुसरी विट पायाच्या गुडघ्यावर फेकून मारली. थोरात हे विरोध करत असताना आदर्श सुनके, कृष्णा गौरया, रिहान शेख, सोफीयान शेख यांनी थोरात यांना हाताने पकडून ठेवले व महिला नामे सबिया, शन्नु, बानूसह यांनी शिवीगाळ करून चापट-बुक्क्यांनी मारहाण केली. त्याचवेळी थोरात यांची आई श्रीमती व्दारका थोरात, दिनेश कावळे, भुषण कुलकर्णी, पियुष बोरखडे, राहुल कावळे, नरेंद्र कावळे यांनी थोरात यांना त्या सर्वांपासून बाजूला घेतले. त्यावेळी मारहाण करणाऱ्यांनी थोरात यांच्यावर घरावर दगड, विटा फेकून मारल्या. त्यानंतर पियुष बोरखडे आणि किशोर उणे यांच्यासोबत मोटरसायकलवरून पोलीस ठाण्यात येत थोरात यांनी तक्रार दिली. पोलिसांनी मेडीकल मेमो देऊन थोरात यांना घाटी रुग्णालयात उपचारासाठी पाठविले. डॉक्टरांनी उपचार करुन हाताचे हाड फॅक्चर असल्याचे सांगितले. तपास पोलीस उपनिरीक्षक प्रताप साळवे करत आहेत.

पोलिसांचा फौजफाटा भवानीनगरात…
दोन गटांत दगडफेक सुरू असल्याची आणि तणाव निर्माण झाल्याची माहिती मिळताच अवघ्या २० मिनिटांत पोलीस आयुक्त प्रवीण पवार, उपायुक्त नवनीत काँवत, प्रशांत स्वामी, सहायक पोलीस आयुक्‍त धनंजय पाटील, रणजित पाटील, सुदर्शन पाटील, मनोज पगारे, संपत शिंदे, पोलीस निरीक्षक निर्मला परदेशी, संभाजी पवार, संदीप गुरमे, अतुल येरमे, सुनील माने यांच्यासह शेकडो पोलीस कर्मचारी, अधिकाऱ्यांनी धाव घेतली. दंगाकाबू पथकालाही पाचारण केले होते. परिस्थितीवर नियंत्रण मिळविण्यात आले. टवाळखोरांची धरपकड सुरू करण्यात आली. ४ जणांना पहाटेपर्यंत ताब्‍यात घेतले होते. थोरात यांच्या तक्रारीतून ८ जणांची नावे निष्पन्न झाली आहेत. आणखी काही लोक आहेत, त्‍यांचीही ओळख पटविण्यात येत आहे. पोलीस आयुक्त प्रवीण पवार परिस्थितीवर नियंत्रण ठेवून आहेत. सध्या परिसरात तणावपूर्ण शांतता आहे. हा एका मोहल्ल्याचा वाद असून, सोशल मीडियावर कुणीही अफवा पसरवू नये. नागरिकांनीही अफवांवर विश्वास ठेवू नये, असे आवाहन पोलीस उपायुक्‍त नवनीत काँवत यांनी केले आहे.