छत्रपती संभाजीनगर (सीएससीएन वृत्तसेवा) : प्लॉटिंग व्यावसायिक रवींद्र सुखदेव बनकर (वय ३६, रा. शिवाजीनगर) यांनी गांधेली शिवारातील विहिरीत उडी घेऊन आत्महत्या केल्याचे सोमवारी (१५ जुलै) सायंकाळी समोर आले. ते चार दिवसांपासून बेपत्ता होते. विहिरीत मृतदेह आढळल्यानंतर खळबळ उडाली. कुटुंबाला त्यांनी लिहिलेली सुसाईड नोट आढळली असून, त्यात एका नेत्याच्या भावाच्या त्रासाला कंटाळून आत्महत्या करत असल्याचे म्हटले आहे.
चितेगाव परिसरात २०१२ मध्ये रवींद्र बनकर यांनी जमीन विकत घेतली होती. जवळ राहणाऱ्या एकाने या जमिनीवर अनधिकृत कब्जा केला होता. रवींद्र यांनी स्थानिक पोलीस ठाण्यात तक्रार केली. मात्र, एका स्थानिक नेत्याचे नातेवाईक असल्याने तक्रारीची दखल घेतली नसल्याचे सुसाईड नोटमध्ये नमूद आहे. ११ जुलैला रवींद्र कामानिमित्त घराबाहेर पडल्यानंतर परतले नव्हते. १२ जुलैला ते बीड बायपास परिसरात शेवटचे दिसल्याचे समोर आले होते. कुटुंबाने चिकलठाणा पोलीस ठाण्यात १२ जुलैला ते बेपत्ता झाल्याची तक्रार केली होती.
सोमवारी सायंकाळी गांधेली परिसरातील विहिरीत त्यांचा मृतदेह आढळला. सुसाईड नोटमध्ये म्हटले आहे, की ग्रामपंचायतीत रीतसर नोंद असतानादेखील कोणीही तक्रारीची दखल घेतली नाही. देवळाईच्या पटेल नामक मित्राकडे कागदपत्रे आहेत. मी माझे जीवन संपवत आहे. मी सगळ्यांकडे जाऊन थकलो, कोणीच मदत केली नाही. दरम्यान, चिकलठाणा पोलीस सुसाईड नोटची खातरजमा करत असून, प्रकरणाचा तपास सुरू असल्याचे पोलीस उपनिरीक्षक योगेश खटाणे यांनी पत्रकारांना सांगितले.
.jpg)
.jpg)
.jpg)
.jpg)
.jpg)
