प्राध्यापिकेला प्रेमाच्या जाळ्यात ओढून पोलिसाचा ३ वर्षे बलात्‍कार!, बेगमपुरा पोलिसांत गुन्हा दाखल

छत्रपती संभाजीनगर (सीएससीएन वृत्तसेवा) : ३२ वर्षीय प्राध्यापिकेला प्रेमाच्या जाळ्यात ओढून तिला लग्‍नाचे आमिष दाखवत पोलीस कर्मचाऱ्याने वारंवार बलात्‍कार केला. प्राध्यापिकेने बेगमपुरा पोलिसांत तक्रार दिली. मात्र बलात्‍कार पुण्याच्या हॉटेलमध्ये घडल्याने हा गुन्हा पुणे शहर पोलिसांकडे वर्ग करण्यात आला आहे.

शफिक जाबिर शेख (वय ३३, रा. ११ वी विंग मोगल मशिद, मुंबई) असे संशयिताचे नाव आहे. तो मुंबई पोलीसमध्ये आहे. तक्रारदार प्राध्यापिका मूळची शेगावची असून, छत्रपती संभाजीनगरच्या एका कॉलेजमध्ये नोकरीला आहे. २५ डिसेंबर २०२१ ते २२ सप्‍टेंबर २०२४ या काळात शफीकने तिच्यासोबत शरीरसंबंध ठेवले. शेगावला दोघांत ओळख झाली होती.

ओळखीचे रुपांतर प्रेमात होऊन दोघांनी लग्‍नाच्या आणाभाका घेतल्या. त्‍याने तिला लग्‍नाचे आमिष दाखवून पुण्यातील कोरेगाव पार्क परिसरातील सनशाईन हॉटेलमध्ये नेत बलात्‍कार केला. त्‍यानंतर संधी मिळेल तसे तो तिच्या शरीराचे लचके तोडत राहिला. यातून ती गर्भवती राहिली. शफीकने तिला तिच्या कुटुंबीयांना जीवे मारण्याची धमकी देत गर्भपात करवला. त्‍यानंतर प्राध्यापिका त्‍याला लग्नासाठी विचारणा करत असता तो टाळाटाळ करत राहिला. तिने स्‍पष्टच विचारले असता त्‍याने नकार दिला. फसवणूक झाल्याचे लक्षात आल्यावर प्राध्यापिकेने बेगमपुरा पोलीस ठाणे गाठून तक्रार दिली. मात्र घटना पुण्यात घडल्याने हा गुन्हा पुण्याच्या कोरेगाव पोलीस ठाण्यात वर्ग करण्यात आला आहे.

अल्‍पवयीनचा मुलीचा विनयभंग
अल्पवयीन मुलीचा पाठलाग करून दोघांनी विनयभंग केल्याची घटना राजूनगर, रेल्वेस्टेशन उड्डाणपुलाजवळ बुधवारी (२५ सप्टेंबर) सायंकाळी सहाला घडली. वेदांतनगर पोलिसांनी रोहन कांबळे, मनोज बैलम (रा. राजूनगर, रेल्वेस्टेशन) या दोघांविरुद्ध गुन्हा दाखल केला आहे. रोहनने मुलगी शाळेत जात असताना तिचा पाठलाग करत मी तुझ्यावर प्रेम करतो, तू मला आवडते. तू माझ्यासोबत बोलत जा. जर माझ्यासोबत बोलली नाही तर मी जीव देईन अशी धमकी दिल्याचे तक्रारीत म्‍हटले आहे. अधिक तपास उपनिरीक्षक संगीता गिरी करत आहेत.