प्रशासन लागले विधानसभा निवडणुकीच्या कामाला!; छत्रपती संभाजीनगरात १०० अधिकाऱ्यांचे प्रशिक्षण सुरू

छत्रपती संभाजीनगर (सीएससीएन वृत्तसेवा) : अवघ्या काही महिन्यांवर आलेल्या विधानसभा निवडणुकीच्या तयारीला प्रशासन लागले असून, छत्रपती संभाजीनगरात छत्रपती संभाजीनगर व नाशिक विभागातील निवडणूक निर्णय अधिकारी व सहायक निवडणूक निर्णय अधिकाऱ्यांचे प्रशिक्षण रविवारपासून (१ सप्‍टेंबर) सुरू झाले. पाच दिवस प्रशिक्षण चालणार आहे. महाराष्ट्र उद्योजकता विकास केंद्र येथील प्रशिक्षण केंद्रावर हे प्रशिक्षण दिले जात असून, यात १०० अधिकारी सहभागी झाले आहेत.

प्रशिक्षणाच्या पहिल्याचे सत्राचे उद्‌घाटन अतिरिक्त मुख्य निवडणूक अधिकारी किरण कुलकर्णी यांच्या हस्ते झाले. निवडणूक प्रक्रियेविषयी देण्यात येणारे प्रशिक्षण आपण आत्मसात करावे. त्यामुळे आपण आगामी निवडणूक प्रक्रियेसाठी सुसज्ज होऊ. निवडणूक आयोगाने दिलेल्या सर्व नियमांचा व कार्यपद्धतींचा अभ्यासच आपल्याला निवडणूक प्रक्रिया सुलभरित्या पार पाडण्यास सहाय्यभूत ठरेल, असे प्रतिपादन श्री. कुलकर्णी यांनी यावेळी केले. यावेळी विभागीय आयुक्त दिलीप गावडे, जिल्हाधिकारी दिलीप स्वामी, बीडचे जिल्हाधिकारी अविनाश पाठक, उपायुक्त अनंत गव्हाणे, निवडणूक आयोगाकडून आलेले तज्‍ज्ञ मार्गदर्शक डॉ. विजयकुमार वर्मा, डॉ. संजयसिंग बटोनिया, प्रवास जैन, जितेंद्र वर्मा, उपजिल्हा निवडणूक अधिकारी देवेंद्र कटके, जिल्हा पुरवठा अधिकारी प्रवीण फुलारी आदी तसेच प्रशिक्षणासाठी आलेले अधिकारी उपस्थित होते.

जिल्हाधिकारी दिलीप स्वामी यावेळी म्हणाले, की प्रशिक्षणातून प्राविण्य प्राप्त करावे व त्यातून निवडणूक प्रक्रिया पारदर्शक पद्धतीने राबवावी. विभागीय आयुक्त दिलीप गावडे म्हणाले की, निवडणूक विषयक प्रशिक्षण हे मन लावून घ्यावे. निवडणूक प्रक्रियेत आता अधिकाधिक डिजीटलायझेशन झाले आहे. त्याचा सराव होणे आवश्यक आहे. निवडणूक प्रक्रियेतील प्रत्येक टप्प्यावरील बारकावे या पाच दिवसीय प्रशिक्षणा दरम्यान दिले जातील, असे ते म्‍हणाले. श्री. कुलकर्णी म्हणाले की, या प्रशिक्षणानंतर आधिकाऱ्यांचे मूल्यमापन होणार आहे. निवडणूक आयोगाने प्रत्येक प्रक्रियेचे सविस्तर नियमावली तयार केलेल्या असतात. काय करावे आणि काय करू नये याच्या कार्यपद्धती दिलेल्या असतात. त्यामुळे प्रत्येक बाबीचा अभ्यास असणे आवश्यक आहे. कोणतीही गोष्ट ही नियमानुसारच होत असते, तसे नियम दिलेले आहेत, त्या प्रत्येक नियमाचा अभ्यास करावा, अशी सूचना त्यांनी केली. प्रास्ताविक देवेंद्र कटके यांनी केले. प्रविणा कन्नडकर यांनी सूत्रसंचालन तर प्रविण फुलारी यांनी आभार मानले.