पोलीस उपायुक्‍त शीलवंत नांदेडकर यांच्या १७ वर्षीय मुलाची आत्‍महत्‍या, छत्रपती संभाजीनगर हादरले

छत्रपती संभाजीनगर (सीएससीएन वृत्तसेवा) : छत्रपती संभाजीनगर शहर पोलीस दलातील पोलीस उपायुक्‍त शीलवंत नांदेडकर यांचा बारावी सायन्सला शिकणारा मुलगा साहिल शीलवंत नांदेडकर (वय १७, रा. जिज्ञासा बंगला, रेल्वेस्टेशन रोड, स्‍नेहनगर) याने राहत्या घरात गळफास घेऊन आत्महत्या केल्याने अवघे पोलीस दल हळहळले आहे. ही घटना रविवारी (१३ ऑक्‍टोबर) सकाळी सहाला समोर आली.

नांदेडकर कुटुंबीयांनी दसरा सण साजरा केला. रात्री उशिरापर्यंत साहिलने आई-वडिलांसोबत गप्पा मारल्या. त्यानंतर सर्व जण झोपी गेले. सकाळी वडील मार्निंग वॉकला बाहेर जाण्यासाठी निघाले असता, साहिल झोपेतून उठला नसल्याचे त्‍यांच्या लक्षात आले. त्‍यांनी त्‍याच्या खोलीचा दरवाजा वाजवून आवाज दिला. मात्र प्रतिसाद मिळाला नाही. त्‍यांनी खिडकीतून डोकावले असता साहिलने गळफास घेतल्याचे त्‍यांच्या लक्षात आले. त्यांनी त्याला तत्काळ घाटी रुग्णालयात दाखल केले.

डॉक्‍टरांनी तपासून त्याला मृत घोषित केले. साहिलवर प्रतापनगर स्मशानभूमीत दुपारी ४ वाजता अंत्यसंस्कार करण्यात आले. या वेळी पोलीस आयुक्‍त प्रवीण पवार, पोलीस अधीक्षक डॉ. विनयकुमार राठोड, पोलीस उपायुक्‍त नवनीत काँवत, नितीन बगाटे, प्रशांत स्वामी, अपर्णा गिते, आ. प्रदीप जैस्वाल, माजी महापौर नंदकुमार घोडेले यांच्यासह सर्व पोलीस निरीक्षक, राजकीय, शैक्षणिक आणि सामाजिक क्षेत्रातील नागरिकांची उपस्थिती होती. साहिलच्या पश्चात आई, वडील, आजी, आजोबा आहेत.

आरशावर लिहिले, लव्ह यू बोथ!
साहिल अभ्यासात हुशार होता. त्‍याला दहावीत चांगले गुण मिळाले होते. आयआयटीमध्ये प्रवेश मिळवण्यासाठी जेईई अॅडव्हान्स परीक्षेची तयारी करीत होता. त्याने टोकाचे पाऊल उचलल्यामुळे त्याच्या नातेवाइकांसह सर्वांनाच धक्का बसला आहे. याप्रकरणी वेदांतनगर पोलिस ठाण्यात अकस्मात मृत्यूची नोंद करण्यात आली आहे. आत्महत्येपूर्वी घरातील आरशावर साहिलने मजकूर लिहिला आहे, की मी जीवनाचा आनंद घेतला आहे. मी माघार घेत नसून मला नवी सुरुवात करायची आहे. लव्ह यू बोथ…