छत्रपती संभाजीनगर (सीएससीएन वृत्तसेवा) : दाम्पत्याला उडवून सुसाट कार पसार झाली. यात पतीचा मृत्यू झाला, तर पत्नी जखमी झाली आहे. ही घटना सोमवारी (४ नोव्हेंबर) रात्री साडेअकराच्या सुमारास विद्यापीठ गेटसमोर घडली. दाम्पत्य जेवण झाल्यानंतर शतपावली करत असतानाच काळ ओढावला.
एलिएजर जॉर्ज इंगल्स (वय ४३, रा. शांतीपुरा, नंदनवन कॉलनी) असे मृत्यू झालेल्याचे नाव आहे, तर त्यांची पत्नी कांचन (वय ३८) जखमी झाल्या आहेत. एलिएजर हे एका कारच्या शोरूममध्ये सेल्स मॅनेजर होते. सोमवारी रात्री जेवण केल्यानंतर कारने विद्यापीठ परिसरात आले. गेटसमोर कार उभी करून ते अजिंठा होस्टेलच्या दिशेने चालत होते.
मागून भरधाव आलेल्या कारचालकाने त्यांना उडवले. धडक इतकी भीषण होती, की ते काही क्षणांसाठी हवेत उडाले. त्यानंतर रस्त्यावर कोसळले. त्यांच्या डोक्याला गंभीर मार लागला. जखमी कांचन यांनी रस्त्याने जाणारे वाहन थांबवून पतीला घाटी रुग्णालयात नेले. तिथून त्यांना खासगी रुग्णालयात हलविण्यात आले. मंगळवारी (५ नोव्हेंबर) पहाटे पाचच्या सुमारास त्यांचा उपचारादरम्यान मृत्यू झाला.
ठाण्यांचा हद्दीचा वाद…या प्रकरणात ठाण्यांच्या हद्दीच्या वादात नातेवाइकांना मनस्ताप सहन करावा लागला. नातेवाइक तक्रार करण्यासाठी छावणी पोलीस ठाण्यात गेले असता त्यांना घटनास्थळ विचारून बेगमपुरा पोलीस ठाण्यात जायला सांगण्यात आले. बेगमपुरा पोलिसांनी पुन्हा छावणी पोलीस ठाण्यात पाठविले. त्यानंतर छावणी पोलिसांनी कारचालकाविरुद्ध गुन्हा नोंदवला.
.jpg)
