पाठलाग, शिट्टी वाजवून छेड, नंतर थेट तरुणीच्या अंगाला स्पर्श… पत्‍नी, दोन मुले असलेल्या मुजम्‍मिलची रोडरोमिओगिरी, पोलिसांनी केला विनयभंगाचा गुन्हा दाखल, गळा कापून घेतला होता पण आता प्रकृती स्थिर

छत्रपती संभाजीनगर (सीएससीएन वृत्तसेवा) : पत्‍नी, दोन मुले असूनही रोडरोमिओगिरी करणाऱ्या मुजम्मिल आरिफ खान उर्फ एमडी (२९, रा. चिश्तिया कॉलनी) याच्याविरुद्ध सिडको पोलिसांनी विनयभंगाचा गुन्हा दाखल केला आहे. तरुणीचा पाठलाग करून शिट्टी मारत बोलण्याचा हट्ट करून त्‍याने स्वतःच्या गळ्यावर चाकूने वार केले होते. ही घटना शनिवारी (६ जुलै) रात्री १० वाजता एमजीएम परिसरात घडली होती. आता त्‍याची प्रकृती स्थित आहे.

नक्की काय घडले?
पीडित तरुणी एमजीएम परिसरातील एका हॉटेलमध्ये नोकरी करते. रात्री काम संपवून ती नेहमीप्रमाणे सेव्हन हिलच्या दिशेने पायी जात होती. मुजम्मिलने तिचा पाठलाग सुरू केला. तरुणीच्या ही बाब लक्षात आली. पण तिने दुर्लक्ष केले. त्यामुळे मुजम्मिलने तिला बोलण्याचा प्रयत्न केला. तिने त्याला प्रतिसाद दिला नाही. काही अंतरावर त्याने पुन्हा शिट्टी वाजवून छेड काढली. यानंतरही तिने कोणतीही प्रतिक्रिया न दिल्याने त्‍याने थेट तिच्या अंगाला स्पर्श केला. त्‍यामुळे तरुणीने आरडाओरडा सुरू केली. त्यामुळे लोक धावून आले. तेवढ्यात मुजम्मिलने चाकू काढून थेट स्वतःचा गळा कापून घेतला. नागरिकांनी तत्काळ त्याला एमजीएम रुग्णालयात दाखल केले.

रात्रभर दंगा काबू पथक तैनात…
घटनेची माहिती मिळताच सिडकोचे पोलीस निरीक्षक अतुल येरमे यांनी घटनास्थळी धाव घेतली. अनुचित प्रकार घडू नये म्‍हणून रात्रभर परिसरात दंगाकाबू पथक तैनात केले. मुजम्मिलवर शस्‍त्रक्रिया करण्यात आली असून, त्‍याची प्रकृती स्थिर आहे. तरुणीच्या जबाबानुसार मुजम्‍मिल व तिची पहिली कुठलीही ओळख नाही. त्याने अचानक तिचा पाठलाग करून शिट्टी मारून छेड काढली. त्यामुळे तिच्या आरोपांनुसार हा स्पष्टपणे विनयभंगाचा गुन्हा असल्याचे पोलीस निरीक्षक अतुल येरमे यांनी पत्रकारांना सांगितले. शनिवारी रात्रीच सिडको ठाण्यात विनयभंग आणि रस्ता अडविल्याचा गुन्हा मुजम्‍मिलविरुद्ध दाखल केल्याची माहिती सहायक पोलीस आयुक्त धनंजय पाटील यांनी पत्रकारांना दिली. मुजम्मिल जुन्या गाड्यांच्या खरेदी-विक्रीचा व्यवसाय करतो. तो विवाहित असून त्‍याला दोन मुले आहेत. तरीही तो रोडरोमिओगिरी करत होता.