पत्नीच्या बाहेरख्यालीपणामुळे ३७ वर्षीय युवकाची आत्‍महत्‍या!; शिवनेरी कॉलनी हादरली!!

छत्रपती संभाजीनगर (सीएससीएन वृत्तसेवा) : पत्नीच्या बाहेरख्यालीपणामुळे तणावात गेलेल्या ३७ वर्षीय युवकाने बुधवारी (७ ऑगस्ट) पहाटे पाचच्या सुमारास गळफास घेऊन आत्‍महत्‍या केली. ही घटना सिडको पोलीस ठाण्याच्या हद्दीतील शिवनेरी कॉलनीत घडली. अशोक दत्तू दळवे असे या युवकाचे नाव आहे.

दळवे हे मूळ केज तालुक्यातील कानडी बदनचे आहेत. पत्नी, दोन मुलांसह ते शिवनेरी कॉलनीत भाडेतत्त्वावर घर घेऊन राहत होते. २०११ मध्ये त्यांचे लग्न पूजा साळुंके (रा. एन ७, सिडको) हिच्याशी झाले होते. अशोक यांचे वडील दत्तू यांनी सिडको पोलिसांत या प्रकरणी तक्रार दिली. तक्रारीत केलेल्या आरोपांनुसार, लग्नाच्या काही महिन्यांतच अशोकला पूजाच्या विवाहबाह्य संबंधाविषयी कळले होते. त्याने तसे वडिलांनाही सांगितले होते. दोन्ही कुटुंबांच्या मध्यस्थीनंतर अशोक व पूजा पुन्हा सोबत राहू लागले होते. २०१३ व २०१६ मध्ये त्यांना मुलगा, मुलगी अशी दोन अपत्य झाली. २०२२ मध्ये अशोकला पुन्हा पूजाच्या बाहेरख्यालीपणाबद्दल कळले. त्‍याने तसे पुन्हा वडिलांना कळवले. यामुळे वाद वाढून पूजाच्या घरच्यांनी अशोकला मारहाणही केली होती. त्‍यामुळे अशोक नैराश्यात गेला होता. सतत जीव देण्याबाबत बोलून दाखवत होता. ५ ऑगस्ट २०२४ रोजी पूजाने सासरच्यांना कॉल करून ती माहेरी राहण्यास जात असल्याचे सांगितले.

६ ऑगस्टला अशोक यांचे आई-वडील पूजाच्या माहेरी गेले व तिची समजूत घातली. पण पूजाने अशोककडे जाण्यास नकार दिला. त्यामुळे ते अशोककडे परतले. त्यांनी घडलेली हकीकत अशोक यांना सांगितली. त्यानंतर तिघेही झोपी गेले. पहाटे चारला अशोक यांच्या आईला जाग आल्यानंतर त्या स्वयंपाकघरात गेल्या असता अशोकने गळफास घेतल्याचे दिसले. बुधवारी दुपारी अशोक यांचे वडील दत्तू (वय ६५) यांनी सिडको पोलिसांत तक्रार दिली. त्यावरून पोलीस निरीक्षक अतुल येरमे यांनी पूजा व तिच्या कुटुंबाविरुद्ध गुन्हा दाखल करण्याचे आदेश दिले. पूजासह सासू सुरेखा हनुमंत साळुंके, सासरा हनुमंत व मेहुणा अभिजीजविरुद्ध गुन्हा दाखल करण्यात आला आहे. अधिक तपास उपनिरीक्षक निशिगंधा म्हस्के तपास करत आहेत. घटनेनंतर सर्व आरोपी पसार झाले आहेत.