पत्‍नीच्या डोळ्यावर मोबाइल फेकून मारल्याने गंभीर दुखापत, पतीविरुद्ध गुन्हा दाखल, वाळूजची घटना

छत्रपती संभाजीनगर (सीएससीएन वृत्तसेवा) : उधारी फेडण्यासाठी माहेरावरून पैसे आण, असे म्‍हणून पतीने ३१ वर्षीय विवाहितेच्या डोळ्यावर मोबाइल फेकून मारत गंभीर दुखापत केल्याची घटना वाळूजच्या गणेश कॉलनीत समोर आली आहे. विवाहितेच्या तक्रारीवरून पोलिसांनी तिच्या पतीविरुद्ध बुधवारी (११ डिसेंबर) गुन्हा दाखल केला आहे.

कल्‍पना संजय शिंदे (वय ३१, रा. गणेश कॉलनी, वाळूज) यांनी या प्रकरणात तक्रार दिली आहे. त्‍यांचे लग्‍न १९ फेब्रुवारी २०१२ रोजी संजय शिंदे (रा. गुरुधानोरा, ता. गंगापूर) याच्यासोबत झाले. त्‍यांना एक मुलगी, दोन मुले आहेत. लग्‍नानंतर सुरुवातीला काही दिवस कल्पना यांना पतीने चांगली वागणूक दिली. मात्र नंतर पती दारू पिऊन घरी येत शिवीगाळ करायचा. आई-वडिलांकडून पैसे घेऊन ये म्‍हणून मारहाण करायचा, असे कल्पना यांनी तक्रारीत म्‍हटले आहे.

११ डिसेंबरला काय घडले?
११ डिसेंबर २०२४ रोजी रात्री ९ च्या सुमारास कल्पना या घरात स्वयंपाक करत असताना पती संजय दारू पिऊन आला. मला लोकांचे उधार घेतलेले पैसे द्यायचे आहेत. तू तुझ्या आई-वडिलांकडून पैसे घेऊन ये, असे म्‍हणून शिवीगाळ करून मारहाण केली. नंतर खिशातील मोबाइल जमिनीवर फेकून फोडला व तोच मोबाइल कल्पना यांच्या डोळ्यावर जोराने मारला. त्‍यामुळे कल्पना यांच्या उजव्या डोळ्याजवळ जखम झाली. रक्‍त निघून लागले. संजय घरातून निघून गेला. कल्पना यांनी वाळूज पोलीस ठाण्यात जाऊन तक्रार दिली. पोलिसांनी त्‍यांना उपचारासाठी घाटी रुग्णालयात पाठवले. अधिक तपास पोलीस अंमलदार किरण जाधव करत आहेत.