छत्रपती संभाजीनगर (सीएससीएन वृत्तसेवा) : पतीशी पटत नसल्याने आई-वडिलांकडे राहणाऱ्या २३ वर्षीय तरुणीला घराजवळील तरुणाने जाळ्यात ओढण्याचा प्रयत्न केला. ती ऐकत नसल्याचे पाहून घरात घुसून तिची छेड काढत तिचे फोटो सोशल मीडियावर व्हायरल करण्याची धमकी दिली. हा प्रकार गुरुवारी (८ ऑगस्ट) रात्री वाळूज महानगरात समोर आली आहे. काकासाहेब शिवाजी पारधे (रा. मुरमी, ता. गंगापूर) असे संशयिताचे नाव आहे. त्याच्याविरुद्ध वाळूज एमआयडीसी पोलिसांनी गुन्हा दाखल केला आहे.
रुपाली (नाव बदलले आहे) आपल्या मुलासह वाळूज महानगरात आई-वडिलांकडे राहते. लग्नापूर्वी तिची घराशेजारी राहणाऱ्या काकासाहेबशी ओळख झाली होती. त्यावेळी काकासाहेबने तिच्या आई-वडिलांकडे तिचा हात मागितला होता. मात्र तेव्हा तिच्या आई-वडिलांनी त्याला नकार दिला होता. त्यानंतर रुपालीच्या पालकांनी तिचा विवाह नात्यातील तरुणासोबत लावून दिला. मात्र पतीसोबत रुपालीचे कालांतराने खटके उडू लागले.
वर्षभरापूर्वी ती मुलाला घेऊनआई-वडिलांकडे राहायला आली. तेव्हापासून ती माहेरीच राहते. ही बाब काकासाहेबला कळल्यानंतर त्याने तिला कॉल करणे सुरू केले. तिने त्याचा नंबर ब्लॉकमध्ये टाकला तरी तो अनोळखी क्रमांकावरून कॉल करून तू मला खूप आवडतेस, तू माझ्यासोबत लग्न कर, तू नकार दिला तर तुझ्यासह कुटुंबीयांना मारून टाकीन, अशा धमक्या देत होता. गुरुवारी रात्री साडेनऊला त्याने हद्दच केली. तिच्या घरी येत मला तुझ्यासोबत लग्न करायचे आहे, असे म्हणत सोबत येण्याचा हट्ट धरला.
तिच्या आईने हा प्रकार पाहून आरडाओरड सुरू केली. त्यामुळे शेजारी धावून आले. काकासाहेबने त्यांनाही शिवीगाळ केली. माझ्या मोबाइलमध्ये रुपालीचे फोटो आहेत. तुम्ही विरोध केला तर तिचे फोटो सोशल मीडियावर व्हायरल करेल, अशी धमकी काकासाहेबने दिली. त्यानंतर रुपालीने वाळूज एमआयडीसी पोलीस ठाणे गाठून तक्रार दिली. त्यावरून पोलिसांनी काकासाहेबविरुद्ध गुन्हा दाखल केला आहे.
.jpg)
.jpg)
.jpg)
.jpg)
.jpg)
