छत्रपती संभाजीनगर (सीएससीएन वृत्तसेवा) : पतीच्या मित्राची ३२ वर्षीय विवाहितेवर वाईट नजर पडली. घरात तिला एकटी पाहून त्याने अश्लील चाळे करत जबरदस्ती करण्याचा प्रयत्न केला. त्याचवेळी तिचा पती घरी आला. ते पाहून त्याने पळ काढला. ही घटना वाळूज एमआयडीसीत गुरुवारी (१४ नोव्हेंबर) सायंकाळी घडली. महिलेने दिलेल्या तक्रारीवरून वाळूज एमआयडीसी पोलिसांनी अनिल कर्डीले या युवकाविरुद्ध गुन्हा दाखल केला आहे.
पीडित महिला पती, दोन मुलांसह राहते. संशयित अनिल तिच्या पतीचा मित्र आहे. तो अधूनमधून त्यांच्या घरी येत होता. यादरम्यान त्याची वाईट नजर महिलेवर पडली. तो तिच्याशी जवळीक साधण्याचा प्रयत्न करू लागला. लगट करत असल्याने त्याचा उद्देश ओळखून विवाहितेने त्याला यापूर्वीच बजावले होते. मात्र तरीही तो वारंवार तिच्या अंगलट येत होता. ही बाब विवाहितेने पतीला सांगितल्यानंतर तिच्या पतीने त्याला जाब विचारला. त्यानंतर तो तिच्या घरी बरेच दिवस आला नव्हता.
गुरुवारी सायंकाळी ती घरात एकटी होती. त्याचवेळी अनिल तिच्याकडे आला. घरात घुसून तिच्यासोबत अश्लील चाळे सुरू लागला. तिने विरोध केला असता तू आरडाओरड केलीस तर तुझ्या पती व मुलांना जीवे मारेल, अशी धमकी त्याने दिली आणि बलात्काराचा प्रयत्न करू लागला. दोघांत झटापट सुरू असतानाच तिचा पती घरी आला. समोरील दृश्य पाहून तो हादरला. तिचा पती आल्याचे पाहून अनिलने तिथून पळ काढला. त्यानंतर महिलेने पतीसोबत येऊन वाळूज एमआयडीसी पोलीस ठाण्यात तक्रार दिली. पोलिसांनी अनिलविरुद्ध गुन्हा दाखल केला असून, अधिक तपास पोलीस अंमलदार जी. के. कोंडके करत आहेत.
.jpg)
.jpg)
.jpg)
