नाशिकहून दुचाकी चोरून छ. संभाजीनगरात आणली, जवाहरनगर पोलिसांनी रोपळेकर चौकात पकडले

छत्रपती संभाजीनगर (सीएससीएन वृत्तसेवा) : नाशिक येथून मोटारसायकल चोरी करून छत्रपती संभाजीनगरला आणणाऱ्या चोरट्याला जवाहरनगर पोलिसांच्या विशेष पथकाने सोमवारी (१६ डिसेंबर) दुपारी एकच्या सुमारास जेरबंद केले. त्‍याला पुढील तपासासाठी नाशिक पोलिसांच्या ताब्‍यात देण्यात आले आहे.

सोमवारी दुपारी १ ला जवाहरनगर पोलिसांच्या विशेष पथकाचे पोलीस अंमलदार मारोती गोरे, मोफतलाल राठोड यांना गुप्त बातमीदारामार्फत माहिती मिळाली, की रोपळेकर हॉस्पिटलजवळ एक जण चोरीची स्प्लेंडर मोटरसायकल घेऊन येणार आहे. ही माहिती मिळताच वरिष्ठ पोलीस निरीक्षक अशोक शरमाळे यांच्या मार्गदर्शनाखाली सहायक पोलीस निरीक्षक अतिश लोहकरे, पोलीस उपनिरीक्षक मारोती खिल्लारे, पोलीस अंमलदार चंद्रकांत पोटे, पोलीस अंमलदार मारोती गोरे, मोफतलाल राठोड, विनोद बनकर यांनी रोपळेकर हॉस्पिटलजवळ सापळा रचून मोटारसायकल घेऊन प्रवीण रामभाऊ पाईकराव (वय ३२, रा. जुनी मुकुंदवाडी गाव, Avoin हॉटेलमागे, मुकुंदवाडी) येताच झडप घालून पकडले.

त्याने ही मोटरसायकल देवळाली नाशिक रोड येथील आठवडे बाजारातून चोरी केल्याची कबुली दिली. या मोटरसायकलीबाबत माहिती घेतली असता ती उपनगर पोलीस ठाणे, नाशिकच्या हद्दीतून चोरीला गेल्याची तक्रार अक्षय गौतम बोराडे (वय ३०, पिंपळगाव खांब ता. जि. नाशिक) यांनी दिलेली आढळली. संशयित चोरटा मोटारसायकलीसह पुढील तपासासाठी नाशिक गुन्हे शाखेचे पोलीस उपनिरीक्षक मुक्‍तेश्वर लाड यांच्या स्वाधीन करण्यात आला. ही कारवाई पोलीस आयुक्त प्रवीण पवार, पोलीस उपायुक्त नवनीत काँवत, सहायक पोलीस आयुक्त रणजीत पाटील, वरिष्ठ पोलीस निरीक्षक अशोक शरमाळे यांच्या मार्गदर्शनाखाली सहायक पोलीस निरीक्षक अतिश लोहकरे, पोलीस उपनिरीक्षक मारोती खिल्लारे, पोलीस अंमलदार चंद्रकांत पोटे, पोलीस अंमलदार विनोद बनकर, मारोती गोरे, मोफतलाल राठोड यांनी केली.