छत्रपती संभाजीनगर (सीएससीएन वृत्तसेवा) : समोरच्या सीटवर बसलेल्या महिला डॉक्टरला वारंवार बॅड टच करून विनयभंग करण्यात आल्याची धक्कादायक घटना दिल्ली ते छत्रपती संभाजीनगर विमानप्रवासात सोमवारी (२ सप्टेंबर) सायंकाळी सव्वा सहा ते साडेसहादरम्यान घडला. विशेष म्हणजे, अश्लील कृत्य वारंवार घडूनही डॉक्टर महिलेच्या तक्रारीवर कारवाई करताना सिडको एमआयडीसी पोलिसांनी संशयित आसीफ खान अन्वर अहमद (वय ३९, बारी कॉलनी, रा. कटकट गेट) याच्याविरुद्ध गुन्हा दाखल केला, पण प्राथमिक चौकशी करून पाच तासांतच नोटीस बजावून सोडले.
इंडिगोच्या विमानात ही बॅड घटना घडली. छत्रपती संभाजीनगरातील ५५ वर्षीय महिला डॉक्टर या पती आणि मित्र-मैत्रिणींसोबत दिल्लीला फिरायल्या गेल्या होत्या. सोमवारी परत निघाल्या. दुपारी ४:४५ वाजता दिल्ली विमानतळावरून इंडिगो विमानाने उड्डाण घेतले. त्यांच्या मागच्या सीटवर आसीफ कंपनीच्या सहकाऱ्यांसोबत प्रवास करत होता. प्रवास सुरू होताच आसीफने महिलेच्या शर्टमध्ये हात घातला. चुकून स्पर्श झाल्याचे समजून डॉक्टर महिलेने सुरुवातीला दुर्लक्ष केले. मात्र विमान उतरण्याच्या काही मिनिटे आधी पुन्हा सीटच्या मागून हात घालून त्याने अश्लील स्पर्श केला.
वारंवार हा प्रकार घडल्याने महिला डॉक्टर संतप्त झाल्या. त्यांनी विमानातच आसिफला जाब विचारला.एकूण ६ वेळा आसिफने बॅड टच केल्याचे महिला डॉक्टरने म्हटले आहे. महिलेने विमानतळावर उतरल्यावर विमानतळ प्रशासनाला या प्रकाराची माहिती दिली. तेथील अधिकाऱ्यांनी डायल ११२ वर संपर्क करून पोलिसांना बोलावून घेतले. सिडको एमआयडीसी पोलीस ठाण्याचे निरीक्षक गजानन कल्याणकर यांनी तत्काळ पथकाला पाठवले.
महिला आणि आसिफला पोलीस ठाण्यात आणल्यानंतर महिलेने लेखी तक्रार दिली. पोलिसांनी आसीफला ताब्यात घेत त्याच्याविरुद्ध गुन्हा दाखल केला. मात्र प्राथमिक चौकशी करून केवळ नोटीस बजावून सोडले. आसिफ हा दिल्लीच्या जाफराबाद परिसरातील नामांकित कंपनीत मॅनेजर आहे. शहरात कटकट गेट परिसरातील बारी कॉलनीत तो राहतो. या प्रकरणाचा अधिक तपास पोलीस उपनिरीक्षक राधा लाटे करत आहेत.
छत्रपती संभाजीनगरात गतिमंद मुलीसह महिलेची छेड…
पहिल्या घटनेत कपडे वाळवत घालताना चिमटा दुसऱ्याच्या दारात पडल्यानंतर तो घेण्यासाठी गेलेल्या अल्पवयीन गतिमंद मुलीसोबत तरुणाने अश्लील चाळे केल्याची घटना २८ ऑगस्ट रोजी दुपारी साडेबाराच्या सुमारास त्रिवेणीनगर सिडको एन-७ येथे घडली. प्रसंजित ठोंबरे असे विनयभंग करणाऱ्याचे नाव आहे. मुलीच्या आईने जाब विचारला असता वंदना ठोंबरे हिने शिवीगाळ करून धमकावले. पीडित मुलगी आईसह गच्चीवर कपडे वाळवत घालत होती. कपड्यांना लावायचा चिमटा दुसऱ्याच्या घरासमोर दारात पडला. तो घेण्यासाठी गतिमंद अल्पवयीन मुलगी गेली. ठोंबरे याने तिचा हात धरून जवळ ओढत अश्लील कृत्य केले. तिने घाबरून आरडाओरड केल्याने तिची आई धावून आली. तिने प्रसंजितला जाब विचारला असता वंदनाने दोघींना शिवीगाळ करून धमकावले. या प्रकरणी सिडको पोलीस ठाण्यात गुन्हा दाखल करण्यात आला आहे.
दुसऱ्या घटनेत महिलेला पाहून अश्लील शेरेबाजी करणाऱ्या अंकुश आसाराम लोंढे (रा. फाजलपुरा, एसटी कॉलनी) याच्याविरुद्ध सिटी चौक पोलिसांनी गुन्हा दाखल केला आहे. १ सप्टेंबरला दुपारी साडेचार वाजता त्याने महिलेला पकडून अश्लील चाळे केले. अपहरण करण्याची धमकी दिली. त्याआधीही अनेक दिवसांपासून पाठलाग करत होता,असे महिलेने तक्रारीत म्हटले आहे.
.jpg)
.jpg)
.jpg)
.jpg)
.jpg)
