छत्रपती संभाजीनगर (सीएससीएन वृत्तसेवा) : वाळूज एमआयडीसीतील ओएसिस चौकात ट्रॅव्हल्सचे ऑफीस चालवणाऱ्या महिलेला शेजारील ट्रॅव्हल्सच्या मालकाने अश्लील शिवीगाळ करून धमक्या दिल्याचा प्रकार समोर आला आहे. २५ वर्षीय व्यावसायिक महिलेच्या तक्रारीवरून वाळूज एमआयडीसी पोलिसांनी भावना ट्रॅव्हल्सचा मालक आबेद पठाण याच्याविरुद्ध बुधवारी (२४ जुलै) गुन्हा दाखल केला आहे. ही घटना मंगळवारी (२३ जुलै) सायंकाळी साडेसातच्या सुमारास घडली.
या प्रकरणात सिडको महानगर १ मध्ये राहणाऱ्या महिलेने तक्रार दिली आहे. त्यांचे ओएसिस चौकात ट्रॅव्हल्सचे ऑफिस आहे. चार वर्षांपासून त्या व्यवसाय करतात. त्यांच्या ऑफिस शेजारी आबेद पठाण याचे भावना ट्रॅव्हल्स म्हणून ऑफिस आहे. त्या व त्यांचे पती ऑफिसवर असताना एक अनोळखी दारू पिलेला व्यक्ती ऑफिसमध्ये येऊन विनाकारण वाद घालू लागला. त्याला महिला व त्यांचे पती समजावून सांगत असताना आबेद पठाण तिथे आला व त्याचा काही एक संबंध नसताना महिलेला म्हणाला, की तुम्ही आमच्याकडे येणाऱ्या गिऱ्हाइकांना तुमच्याकडे बोलावून घेता.
तुम्ही आमचा व्यवसाय होऊ देत नाही, असे म्हणत तुम्ही येथे ट्रॅव्हल्सचे तिकिट बुकिंग ऑफिस चालवत नसून या ठिकाणी बुधवार पेठसारखा धंदा चालवता, असे तो जोरजोरात लोकांसमोर म्हणाला. त्यामुळे महिलेच्या मनास लज्जा निर्माण झाली. त्यांचे पती आबेदला समजावून सांगत असताना आबेदने शिवीगाळ केली. तुम्हाला बघून घेतो, अशी धमकी दिली. त्यानंतर महिलेने वाळूज एमआयडीसी पोलीस ठाण्यात तक्रार दिली. त्यावरून पोलिसांनी गुन्हा दाखल केला आहे. अधिक तपास पोलीस अंमलदार योगेश कासारले करत आहेत.
.jpg)
.jpg)
.jpg)
.jpg)
.jpg)
