तरुणीसोबत वाद झाला, तिने ३ मित्र आणून झोडपले!; उदगिरे हॉस्पिटलच्या केमिस्टसोबत घडला हा प्रकार

छत्रपती संभाजीनगर (सीएससीएन वृत्तसेवा) : किरकोळ कारणावरून वाद झाल्यानंतर तरुणीने ३ मित्रांना सोबत आणून उदगिरे हॉस्पिटलच्या केमिस्टला बेदम मारहाण केली. यात केमिस्ट जखमी झाला आहे. ही घटना गजानन महाराज मंदिराजवळील उदगिरे हॉस्पिटलसमोर घडली.

शुभम रामनाथ इंगोले (वय २५, रा. जय भवानीनगर) असे जखमी केमिस्टचे नाव आहे. त्याच्या तक्रारीवरून जवाहरनगर पोलिसांनी हल्ला करवणारी आदिती राजपूत व तिच्या ३ मित्रांविरुद्ध गुन्हा दाखल केला आहे. तक्रारीत शुभमने म्हटले आहे, की तो उदगिरे हॉस्पिटलमध्ये केमिस्ट आहे. शुक्रवारी (१३ सप्‍टेंबर) ते मेडिकलमध्ये होता. तिच्या सहकारी तरुणीने मेसचा डब्बा लावलेला होता. मेसचे जेवण दिलेला डबा घेण्यासाठी मेसवाली महिला सायंकाळी सातला आली.

त्यावेळी शुभम म्हणाला, की तुम्ही आतमध्ये येऊ नका. मी डबा बाहेर आणून देतो. यामुळे मेसवाल्या महिलेला राग आला. थोडावेळ थांबल्यावर ती मोकळा टिफिन डबा घेऊन रागारागाने निघून गेली. त्यानंतर काही वेळाने त्या मेसवाल्याबाईची मुलगी आदिती राजपूत ही टिफिन घेऊन हॉस्पिटलमध्ये आली. आईला डबा का दिला नाही, असे म्हणून वाद घालू लागली. तेवढ्यात डॉ. श्वेतांबरी उदगिरे या आल्या. त्यांच्यासोबतही त्या मुलीने वाद घातला.

त्यामुळे डॉ. उदगिरे यांनी तिला यापुढे टिफिन देऊ नको. बंद कर, असे सांगितले. त्यानंतर ती मुलगी रागारागाने निघून गेली. रात्री साडेनऊला आदिती राजपूतने तिच्या मोबाइलवरून शुभमला कॉल केला व बाहेर बोलाविले. त्यामुळे शुभम, हॉस्पिटल स्टाफमधील कृष्णा धुमाळ, सूरज येडे असे हॉस्पिटलच्या गेट बाहेर आले. हॉस्पिटलसमोरील सार्वजनिक रस्त्यावर आदिती उभी होती. तिने शुभमला पाहून तिच्यासोबत असलेल्या मुलांना इशारा केला की हाच आहे तो. त्यानंतर तिच्यासोबत असलेल्या ३ मुलांनी शुभमचा गळा पकडून मारहाण करायला सुरुवात केली. हातातील कड्याने मारहाण केल्याने शुभम जखमी झाला.