ठाकरे-शिंदे गटांत पडेगावमध्ये जोरदार राडा; हॉकीस्टिक, बेसबॉल स्टिकने हाणामारी, एकमेकांचे गळे दाबले!

छत्रपती संभाजीनगर (सीएससीएन वृत्तसेवा) : पोळ्यानिमित्त निघालेल्या मिरवणुकीत शिवसेनेच्या ठाकरे गट व शिंदे गटाच्या पदाधिकाऱ्यांत धुमश्चक्री उडाली. हॉकीस्टिक, बेसबॉल स्टिकने हल्ला एकमेकांवर हल्ला चढविण्यात आले. गळे दाबले. पोलिसांनी वेळीच धावून आवरले. सोमवारी (२ सप्‍टेंबर) रात्री ८ वाजता पडेगावमध्ये ही घटना घडली. छावणी पोलीस ठाण्यात परस्परविरोधी तक्रारीवरून गुन्हे दाखल करण्यात आले आहेत. या राड्यामुळे पडेगावमध्ये तणाव निर्माण झाला होता.

एकाच रस्त्यावर दोन्ही गटांची मिरवणूक समोरासमोर आल्याने ही घटना घडली. गजानन लोखंडे (वय ३३, रा. जुना भावसिंगपुरा) यांच्या तक्रारीनुसार, तो मित्र, कुटुंबासह मिरवणुकीत असताना अंबादास म्हस्के व इतरांनी शिवीगाळ करून तू येथे आला कसा, तुझे हात-पाय मोडतो, आज तुला सोडत नाही, असे म्हणत मारहाण सुरू केली. त्याच्या अन्य सहकाऱ्यांनी फावडे, बेसबॉल स्टिकने मारहाण करून जखमी केल्याचे तक्रारीत म्‍हटले आहे. त्यांच्या तक्रारीवरून अंबादास म्हस्के, खंडू म्हस्के, नंदू म्हस्के, एकनाथ घनवट, सचिन घनवट, यश म्हस्के, आकाश म्हस्के, नितीन घनवट, गणेश शेळके, राजेश जळके, अभि म्हस्के, किसन कणिसे, रुपेश घनवट व अन्य जमावाविरुद्ध गुन्हा दाखल करण्यात आला आहे.

या प्रकरणात यश अंबादास म्हस्के (वय १९, रा. पडेगाव) यानेही तक्रार दिली असून, तक्रारीत म्हटले आहे, की गणेश लोखंडे व इतरांनी शिवीगाळ केली. आमची मिरवणूक जात असताना, तुम्ही इथेच का मिरवणूक घेऊन आलात? असे म्हणत मिरवणूक मागे घेण्यास सांगितले. त्यातून वाद होऊन गणेश लोखंडे व त्‍याच्या साथीदारांनी लाकडी दांड्याने मारहाण केली. वडिलांचा गळा दाबून जीवे मारण्याची धमकी दिली. या तक्रारीवरून गणेश कौतिकराव लोखंडे, गजानन कौतिकराव लोखंडे, शैलेश लोखंडे, ओम तोर, अमित लोखंडे, गणेश लोखंडे, राजेश लोखंडे, नंदन लोखंडे यांच्यासह १० जणांविरुद्ध गुन्हा दाखल करण्यात आला आहे. हाणामारीच्या घटनेनंतर दोन्ही गटांनी घोषणाबाजी केली. अंबादास म्हस्के शिवसेनेच्या शिंदे गटाचे उपजिल्हाप्रमुख असून, गणेश लोखंडे ठाकरे गटाचे उपशहरप्रमुख आहेत. अनेक दिवसांपासून त्यांच्यात वाद आहे. हा वाद पोळ्याच्या मिरवणुकीत उफाळून आला.